বিপুল খাটনিয়াৰ

বিপুল খাটনিয়াৰ Bipul Khataniyar
জন্ম	২৭ আগষ্ট, ১৯৫৩ শ'লগুৰি, শিৱসাগৰ [1][2]
মৃত্যু	৪ জুলাই, ২০২১ (৬৭ বছৰ) গুৱাহাটী
ৰাষ্ট্ৰীয়তা	ভাৰতীয়
শিক্ষা	নৃতত্ত্ব বিভাগৰ পৰা স্নাতকোত্তৰ ডিগ্ৰী
শিক্ষানুষ্ঠান	বেজবৰুৱা হাইস্কুল (শিৱসাগৰ) বেজবৰুৱা কলেজ গুৱাহাটী বিশ্ববিদ্যালয়
পেচা	ভাৰতৰ নৃতত্ত্ব আৰু ভূতত্ত্ব জৰীপ বিভাগত বিষয়া (২০১৩ চনত অৱসৰ)
সক্ৰিয় হৈ থকা সময়	১৯৮০-২০২১
জনা যায়	গল্পকাৰ, অনুবাদক, প্ৰবন্ধকাৰ
বঁটা, সন্মান, পুৰস্কাৰ আদি	সাহিত্য অকাডেমি বঁটা

বিপুল খাটনিয়াৰ (জন্ম: ১৯৫৩-২০২১ ) (ইংৰাজী: Bipul Khataniyar) আছিল অসমৰ এগৰাকী গল্পকাৰ, প্ৰবন্ধকাৰ আৰু অনুবাদক। তিনিমহীয়া অসমীয়া আলোচনী নতুন পৃথিৱীত গল্প লিখিবলৈ আৰম্ভ কৰা বিপুল খাটনিয়াৰ পৰৱৰ্তী পৰ্যায়ত অসমীয়া গল্প-সাহিত্যৰ এখন পৰিচিত মুখ হৈ উঠে৷ তেখেতৰ প্ৰথমখন গল্প-সংকলন খোজৰ শব্দ প্ৰকাশিত হৈছিল ১৯৮০ চনত৷ তেখেতৰ গল্পত সৰ্বসাধাৰণৰ সুখ-দুখৰ প্ৰতিবিম্ব ফুটি উঠে বুলি কোৱা হয়৷ [1] খাটনিয়াৰৰ সাহিত্য-দৰ্শনত সমাজতান্ত্ৰিক বাস্তৱতা পৰিলক্ষিত হয়৷ [3] তেখেত সত্তৰ দশকৰ শেষৰফালে আৰম্ভ হোৱা ‘নতুন সাহিত্য পৰিষদ’ৰ অন্যতম প্ৰতিষ্ঠাপক সংগঠক আছিল৷[4]

সংক্ষিপ্ত জীৱনী

বিপুল খাটনিয়াৰৰ জন্ম হৈছিল ১৯৫৩ চনৰ ২৭ আগষ্টত ৷ পিতৃৰ নাম সিংহেশ্বৰ খাটনিয়াৰ আৰু মাতৃৰ নাম হেমলতা খাটনিয়াৰ৷ জন্মস্থান আছিল শিৱসাগৰ জিলাৰ শ'লগুৰি ৷ তেখেতে প্ৰাথমিক শিক্ষা গ্ৰহণ কৰে তিনিচুকীয়া জিলাৰ দেওশাল অঞ্চলত৷ ১৯৬৯ চনত শিৱসাগৰৰ বেজবৰুৱা হাইস্কুলৰ পৰা প্ৰাৰম্ভিক শিক্ষা গ্ৰহণ কৰা খাটনিয়াৰে ১৯৭৩ চনত কলেজীয়া শিক্ষা লয় শিৱসাগৰ কলেজৰ পৰা৷ পাছলৈ তেখেতে ১৯৭৫ চনত গুৱাহাটী বিশ্ববিদ্যালয়ৰ পৰা নৃতত্ত্ব আৰু ভূত্ত্বক বিষয়ত স্নাতকোত্তৰ ডিগ্ৰী অৰ্জন কৰে ৷ [3]

কৰ্মজীৱন

১৯৭৭ চনত সহকাৰী ভূতত্ববিদ হিচাপে ভূতত্ব আৰু খনি সঞ্চালকায়লয়ত চাকৰি জীৱন আৰম্ভ কৰা খাটনিয়াৰে ২০১৩ চনৰ ৩১ আগষ্টত সেই কৰ্মৰ পৰা অৱসৰ গ্ৰহণ কৰে৷ [1]

সাহিত্য অনুষ্ঠান নতুন সাহিত্য পৰিষদৰ লগত তেখেত জন্মলগ্নৰে পৰা জড়িত হৈ আছিল৷ দুটা কাৰ্যকাল তেখেতে ৰাজ্যিক সম্পাদকৰো দায়িত্ব পালন কৰিছে৷ পৰিষদৰ মুখপত্ৰ নতুন সাহিত্য খাটনিয়াৰে সম্পাদনা কৰিছিল৷ [3]

বিপুল খাটনিয়াৰে লিখা গল্পৰ সংখ্যা একাধিক৷ তদুপৰি তেখেতে কেইবাখনো গ্ৰন্থ সম্পাদনা কৰিছে ৷ [2] অসমৰ সাহিত্য-সমালোচক অৰিন্দম বৰকটকীয়ে তেখেতৰ সাহিত্য-ৰচনাৰ কথা সুঁৱৰি কয় যে,- "তেখেতৰ শক্তিশালী, প্ৰত্যয়ী আৰু দায়বদ্ধ খোজৰ শব্দ অসমীয়া সাহিত্যত সদায় থাকি যাব৷"^[উদ্ধৃতিৰ প্ৰয়োজন]

সাহিত্যৰাজি

গল্পৰ পুথি

• খোজৰ শব্দ, ১৯৮০
• চিনাকি মুখৰ ছবি, ১৯৯৫
• দখাৰ, ১৯৯৯
• তাই কাপোৰ নিপিন্ধে, ২০০২
• ভিন্ন জীৱন ভিন্ন কথকতা, ২০০৯
• চিনাকি মুখ অচিনাকি ছবি, ২০১০
• ঘঁৰিয়ালডাঙাৰ কথা, ২০১৬
• হাৱা ভাল চলা নাই, ২০২০

সম্পাদিত পুথি

• মোৰ সপোনৰ সূৰ্যৰ মানুহ, হেমাংগ বিশ্বাস (পৰমানন্দ মজুমদাৰৰ সৈতে যুতীয়াভাৱে)
• সূৰ্য ঢকা মেঘ (২০০১)
• নিলিখা গল্প (২০০৯)
• সাহিত্য নিৰ্মাণ প্ৰসংগ (২০০৯)
• হেমাংগ বিশ্বাস (২০১২, পৰমানন্দ মজুমদাৰৰ সৈতে)
• ফুলকুমাৰী কলিতাৰ ‘লোক-সাহিত্যৰ ৰহঘৰা ফকৰা যোজনা’ (দ্বিতীয় সংস্কৰণ, ২০১২)
• শমিক গিৰীশ চন্দ্ৰ (মদন মোহন চৌধুৰীৰ সৈতে, ২০১৪)
• স্মৃতিলেখা : অনিল ৰায়চৌধুৰী স্মাৰক গ্ৰন্থ (২০২১)
• অনিল ৰায়চৌধুৰী ৰচনাৱলী (২০২২) [3]

মৃত্যু

২০২১ চনৰ ৪ জুলাই তাৰিখে বিয়লি ৪ বাজি ৫৫ মিনিটত দিছপুৰ পলিক্লিনিকত সাহিত্যিক বিপুল খাটনিয়াৰৰ দেহাৱসান ঘটে৷ তেখেত দীৰ্ঘদিন ধৰি এক দুৰাৰোগ্য ৰোগত আক্ৰান্ত হৈ আছিল৷ [3][2]

তথ্যসূত্ৰ

1. "বিশিষ্ট গল্পকাৰ বিপুল খাটনিয়াৰৰ মৃত্যু". নিয়মীয়া বাৰ্তা. প্ৰকাশক গুৱাহাটী. ৫ জুলাই, ২০২১. পৃষ্ঠা ১ আৰু ১৩. 
2. "বিশিষ্ট গল্পকাৰ বিপুল খাটনিয়াৰৰ দেহাৱসান". দৈনিক জনমভূমি. প্ৰকাশক গুৱাহাটী. ৫ জুলাই ২০২১. পৃষ্ঠা ১, ৮. Archived from the original on 9 July 2021. https://web.archive.org/web/20210709184418/https://dainikjanambhumi.co.in/05072021/details.php?date=14-05-2014&page=1-8&article=3.jpg&cid=28664। আহৰণ কৰা হৈছে: 5 July 2021. 
3. "বিশিষ্ট গল্পকাৰ বিপুল খাটনিয়াৰৰ জীৱনাসন". দৈনিক অসম. প্ৰকাশক গুৱাহাটী. ৫ জুলাই ২০২১. পৃষ্ঠা ১, ২. https://dainikasam.assamtribune.com/full-page-pdf/epaper/pdf/2021/07/05/dainik-asam/2408। আহৰণ কৰা হৈছে: 5 July 2021. 
4. সঞ্জীৱ পল ডেকা (২০২২). খোজৰ শব্দ. নতুন সাহিত্য পৰিষদ. পৃষ্ঠা. আগকথা.