|
Sierra de Peco
La sierra de Peco ye una sierra de la branca aragonesa[1] de lo Sistema Iberico con dirección N-S situada a lo sud-este de las sierras Modorra y d'Algairén, a lo sud de la depresión d'Ebro y a l'este de Campo Romanos. Fa part chunto con la Sierra d'Algairén y Sierra Modorra de la unidat de Baduls de lo Sistema Iberico, unidat que ye a l'ueste de la falla de Datos[2], manimenos La Uerba desparte la Sierra de Peco de las atras dos sierras. Las suyas altarias principals se troban en Picacho (1182 m), Sant Bartolomeu (1304 m) y Cerro Pelado (1109). Las suyas versants desauguan enta La Uerba, que fluye a l'ueste y norte de la sierra, y recibe las auguas de l'Arroyo del Val, que reculle las auguas de la versant este y sud de la sierra. La superficie de la Sierra de Peco perteneixe a los termins municipals de Cerveruela, Baduls, Villadolz y Villa-reyal de la Uerba. Encara que lo releu se formó en la orochenia alpina, los materials son rocas sedimentarias paleozoicas metamorfizadas (losetas, ortocuarcitas), que se plegoron en la orochenia herzinica. Los carrascals fan part de la vechetación natural d'esta sierra. ToponimiaEn l'Alto Palancia bi ha una fuent y un oronimo toponimicament pareixius (El Peco), que Natividad Nebot Calpe interpreta a partir de lo latín OPACU[3], y que en aragonés central ha dau paco y en atras variants ubago. Manimenos bi ha atras explicacions porque El Peco apareixe en l'antroponimia d'aragoneses y valencianos en la baixa Edat Meya. En portugués peco ye cualsiquier malautía de las plantas que no las deixa creixer, u una planta u animal que no creixen. En gallego peco ye una tierra mala, pero tamién la mata d'una planta. Tamién se diz peco en gallego a la grasura de la porquería que deixa la lana de la ovella cuan la lavan, lo que puet explicar lo nombre d'un pelaire de lo sieglo XV de Zaragoza (García el Peco). João Batista Labanha denominaba a l'altaria mes gran de la sierra San Bartholomeu del Picueço u San Bartholomeo del Picueço en "Itinerario del Reyno de Aragón (1610-1611)", en relación con la ermita de Sant Bartolomeu que bi heba en Villadolz. Ye posible que Picuezo (visible en atros oronimos), tienga relación etimolochica con Peco. Referencias
Bibliografía
|
||||||||||||||||||||||||||||||||||||||||||||||||
