La sierra Carbonera ye una aliniación montanyosa de dirección N-S adintro de la Serranía d'Albarracín y de la branca castellana de lo Sistema Iberico. Destaca por los afloramientos de rocas paleozoicas plegadas en la orochenia herzinica[1].
Se situa a l'este y sud-este de la sierra d'Albarracín sensu stricto, a lo norte de la sierra de Penya Redonda u macizo de Collado de la Plata y a lo sud de lo plano d'Exea d'Albarracín, resaltando respecto a la fuesa de Xiloca.
Toponimia
Se puet trobar en la bibliografía sobre la cheografía fisica de la zona las denominacions de sierra de Gea u sierra de Gea-Carbonera.
En cheolochía se fa servir la denominación especifica de Macizo de Sierra Carbonera pa referir-se a los materials paleozoicos d'edat ordoviciana y siluriana que afloran en lo suyo nuclio y constituitos por las ortoquarcitas y losetas.
L'orichen de l'oronimo Sierra Carbonera se troba en l'actividat tradicional de fer carbón vechetal[2].
Orografía
La principal altaria ye L'alto de la Mata u cerro Carbonera, con 1540 m.
Superficie por municipios y comarcas
La mitat norte de la sierra perteneixe a lo termin municipal d'Exea d'Albarracín, la mitat sud perteneixe a una "manga" de lo termin municipal d'Albarracín que desparte los termins municipals de Bezas y Exea d'Albarracín y a on que ye Valdepesebres y lo Puerto de Dornac.
Cheolochía
Los principals materials cheolochicos representaus en lo macizo paleozoico de sierra Carbonera son las quarcitas armoricanas, las losetas y grauwacas de lo Llandeilo y las quarcitas de lo Valentiniense inferior[3].
Estos materials paleozoicos constituyen un nuclio rodeyau por lo rodeno d'edat permiana y triasica que se situa en altarias menors.
Cheomorfolochía
Las ortoquarcitas constituyen crestas paralelas de dirección norte-sud por estar mes resistents que las losetas, a on que la erosión ha feito varellos[4].
Referencias
Bibliografía
- (es) Julio Muñoz Jiménez, Concepción Sanz Herráiz: Guía Física de España. 5 Las Montañas. Alianza Editorial, 1995.
- (es) Pedro Manuel Artigot Martínez (coordinador): Red natural de Aragón. nº 20, Sierra de Albarracín Prames, 2007.
- (es) Instituto Geológico y Minero de España: Libro Jubilar J.M.Rios. Geología de España Tomo I. Instituto Geológico y Minero de España, 1983.
- (es) Liñán, Eladio, Villas, Enrique, Gozalo, R: El Paleozoico de Teruel, articlo publicau en Introducción a la geología de la provincia de Teruel, Instituto de Estudios Turolenses, 1991.
- (es) Instituto Geológico y Minero de España: Mapa Geológico de España E 1:50.000. Cella. Servicio de publicaciones de Ministerio de Industria y Energía.
