Amariello

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Amariello
Cordenadas de color
HTML		#FFFF00
RGB	(r, g, b)	(255, 255, 0)
CMYK	(c, m, y, k)	(0, 0, 100, 0)
HSV	(h, s, v)	(60°, 100%, 100%)

L'amariello ye una color; ye a color d'a luz en un ran entre os 565 y os 580 nanometros, encara que en realidat ye a mezcla d'as colors verde y roya, que a o uello humán s'adhiben ta formar a color amariella. A suya color complementaria ye l'azul.

Pa matices de color u tendencias de color amariello s'utilizan os adchectius: amarillenco, amarillisco, rossiau y espixorriau. Pa animals d'iste color son utilizaus bayo y cetrín.[1]

Etimolochía

Bi ha diferents hipotesis sobre a etimolochía d'a palabra amariello. A mes común la fa derivar d'o latín AMARUS ("triste", "amargo"), con o sufixo -ELLU (que en aragonés esdeviene -iello). D'esta traza a color amariella se relacionaría con a muerte y con as malautías luengas. L'aragonés s'alinia en este aspecto con as luengas iberorromanicas galaicoportugués ((a)marelo), astur-leyonés (mariellu) y castellano (amarillo), a diferencia d'as luengas galorromanicas occitán (auriòl, jaune) y francés (jaune), y o catalán (groc, d'o latín CROCUS, "zafrán").

En aragonés medieval trobamos a palabra amariello con regularidat tanto en textos comercials como literarios, con a curiosa excepción d'o "Libro d'as Marabillas d'o Mundo" en o que leyemos tanto amariello como jaune. Actualment en aragonés cheneral no se pronuncia lo diftongo -ie- en o sufixo -iello esta palabra, ni sisquiera en parlas conservaderas d'a pronunciación d'este sufixo como o chistabín[2] y benasqués[3], que por a suya situación nordoriental extrema podioron tener atras denominacions en o periodo medieval. Manimenos as normas ortograficas de l'Academia de l'Aragonés recomiendan d'escribir a forma historica d'este sufixo[4].

Usos, simbolismo y expresions

L'amariello ha estau relacionau con a información y lo sensacionalismo, la prensa amariella y los directorios telefonicos de companyías son en muitos países, las pachinas amariellas.

Ye utilizau en sinyalistica per estar una color que se veye dende larga distancia y per estar la color mas visible per lo uello humano. Ye la color tradicional d'o chaleco reflectante de seguranza​ y per ixas mesmas razons tamién los taxis gosan estar d'ixa color.

En Espanya en o teatro se diz que la color amariella da mala suerte perque muitos creyen que Molière murió representando la suya obra Le Malade imaginaire vestiu d'ixa color, per lo que muitos actors privan utilizar-lo en escena.

Referencias

1. (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
2. (es) Fernando Blas Gabarda, Fernando Romanos Hernando: Diccionario Aragonés: chistabín-castellano. (Bal de Chistau). Gara d'Edizions, 2008.
3. (es) Ángel Ballarín Cornel: Diccionario del Benasqués. Institución Fernando el Católico, Zaragoza, segunda edición 1978.
4. (an) Academia de l'Aragonés Propuesta ortografica de l'Academia de l'Aragonés. EDACAR, 7. Zaragoza, 2010. p 63

Vinclos externos

• Se veigan as imáchens de Commons sobre a color amariello.

• Datos: Q943
• Multimedia: Yellow / Q943