|
Reino de Cerdenya
O Reino de Cerdenya estió un estau situato arredol d'a isla de Cerdenya mientres mas de cinco sieglos. Anque en a suya historia encluyó atros territorios como Corcega u Saboya, o estau siempre se dició reino de Cerdenya. Antis de que s'establise a monarquía en a Cerdenya, a isla yera dividita en chuzgatos u giudicatos que yeran gubernatos por chudeces. O primer reino fue creyato por Frederico I Barbarroya en 1164. Feba parti por aquellas envueltas d'o Sacro Imperio Romano Chermanico, anque a sobiranía imperial sobre Cerdenya yera desputata por o Papato. En 1297, o Papa Bonifacio VIII creyó un nuevo reino ta solucionar os pleitos entre a Corona d'Aragón y la casa d'Anchú dimpues d'as Vespras Secilianas. O nuevo rei n'estió Chaime II d'Aragón.  En 1718 a casa de Saboya adquirió lo reino como premio a la suya partecipación en a Guerra de Succesión Espanyola y dende l'inte a capital de facto estió Torino. A sobén se fa referencia a lo estau d'iste periodo como lo Reino de Piemont-Cerdenya. Aintro d'as suyas mugas encluyiba, amás d'a isla de Cerdenya, Saboya, Piemont y lo condau de Niza. En 1792 y dimpués d'a Revolución Francesa, o ducau de Saboya orichinal fue ocupato y se convirtió en o departamento francés de Mont-Blanc, pero en 1814, con o congreso de Viena, o rei recuperó as suyas posesions y amás obtenió tamién, en 1815, o control d'a Republica de Liguria. En 1860 Niza y Saboya se cedioron a Francia por l'aduya que iste país heba dato en a campanya d'unificación d'Italia. En 1861, o reino de Cerdenya se convirtió en un d'os fundadors d'o nuevo Reino d'Italia, y dende allora desapareixió como estau independient.
|
|||||||||||||||||||||||||||||||||
.svg){kind=small}
Portal di Ensiklopedia Dunia
