(
OC)
«Pres m'es talans d'un pec partimen far
a vos, qu'avetz suptil entendemen,
Mossen R., e crey que pessamen
auretz mot gran qual volretz razonar:
estar la nueg en paradis el dia,
malgrat de Dieu, s'aishi far se podia,
o en iffern, qu'a Dieu fos plazers grans.
Chauzetz, qu'ieu say qual chauzira enans.
- Amix n'Arnaut, en paradis estar
Vuelh yeu tostemps, rire ses marrimen,
malgrat de Dieu, de sa mayr'eshimen;
del lor voler no vuelh ges yeu curar;
e vos auretz en ifern malautia,
plazen a Dieu ez a santa Maria,
Mas del plazer auretz mals et afans,
per grans dolors seretz tostemps plorans.
- Mosen R., bem faytz merevilhar
que vos ajatz chauzit tant pegamen,
que Dieu volhatz metre tant a nien
qu'al sieu poder vos volhatz contrastar.
Ab pauc vos dic semla ram d'iretgia,
qu'om deu amar plus Dieu que re que sia;
mas sius membres lo mal que pres els dans
per nos salvar, nolh foratz contrastans.
- Totz homs, n'Arnautz, ques vol desesperar
sera damnatz, si la letra no men,
e vos per cert avetz tan pauc de sen
dezesperan cujatz Dieu alegrar.
Judas le fals passec per sela via;
mas yeu Ramons vuelh dels angels paria,
qu'ieu soy de Dieu per cert tan fis aymans
que, si nolh plac, el m'es fort agradans.
- Mosen Ramons, yeum cugi mielhs salvar
ins en ifern, sol qu'a Dieu sia plazen,
qu'en paradis vos en contradizen
a Dieu, quens volc a son semlan formar.
Beus mou dal cap per cert gran leujaria,
e ia dels sans non auretz cumpanhia,
e s'eneyshi perdetz Dieu els sieus sans,
valgra vos may no fossetz natz abans.
- N'Arnautz, fatz etz, e par ben al parlar,
quar en ifern non ha nulh jauzimen;
ans a per cert nueyt e jorn gran turmen.
Davitz o ditz el sauteri tot clar.
Vostra razos non es mas aurania,
tot quan disetz non es mas fantaumia;
en paradis vuelh ieu esser estans,
que sans Marx ditz que noy ha malanans.
- Mossen Ramons, mal cometreus faria
cura d'armas, fe que deg a m'amia,
Quar en ifern anariu a pas grans,
s'aytals errors lor eratz predicans.
- Amix n'Arnautz, s'il sans payres volia
qu'ieu fos rectors, yeu say que regiria
totas mas gens que no seriu errans
ni ja d'ifern, coma vos, espectans.[3]»
