অসম মাধ্যমিক শিক্ষা পৰিষদ

অসম মাধ্যমিক শিক্ষা পৰিষদ
ল'গ'
উত্তৰসূৰী	অসম ৰাজ্যিক বিদ্যালয় শিক্ষা পৰিষদ
প্ৰতিষ্ঠা	২৯ জানুৱাৰী ১৯৬২
ধৰণ	স্বায়ত্ত্বশাসিত, চৰকাৰী মাধ্যমিক শিক্ষা পৰিষদ
সক্ৰিয়তা	অসক্ৰিয়
প্ৰধান  কাৰ্যালয়	গুৱাহাটী, অসম, ভাৰত
আনুষ্ঠানিক  ভাষা	অসমীয়া, বাংলা, ইংৰাজী, হিন্দী
অধ্যক্ষ	ৰমেশ চন্দ্ৰ জৈন
মাতৃ  সন্থা	শিক্ষা মন্ত্ৰালয়, অসম চৰকাৰ
ৱেবছাইট	https://sebaonline.org/

অসম মাধ্যমিক শিক্ষা পৰিষদ (ইংৰাজী: Secondary Education Board of Assam) (SEBA) অসমৰ মাধ্যমিক আৰু উচ্চ মাধ্যমিক বিদ্যালয়সমূহক স্বীকৃতি প্ৰদান, বিদ্যালয়সমূহত উন্নত মানৰ শিক্ষাৰ নিশ্চিতকৰণ আৰু পৰীক্ষা আয়োজনৰ কৰ্তৃত্ব থকা ৰাজ্যিক পৰ্যায়ৰ এক পৰিষদ আছিল। এই পৰিষদে অসমত হাইস্কুল শিক্ষান্ত পৰীক্ষা (High School Leaving certificate, HSLC) আয়োজন কৰিছিল আৰু উত্তীৰ্ণ ছাত্ৰ-ছাত্ৰীসকলক প্ৰমাণপত্ৰ প্ৰদান কৰিছিল। ২০২৪ চনৰ ১৩ ছেপ্টেম্বৰত অসম মাধ্যমিক শিক্ষা পৰিষদ আৰু অসম উচ্চতৰ মাধ্যমিক শিক্ষা সংসদৰ একত্ৰিত কৰি অসম ৰাজ্যিক বিদ্যালয় শিক্ষা পৰিষদ গঠন কৰা হয়। ইয়াৰ লগে লগে অসম মাধ্যমিক শিক্ষা পৰিষদ ভংগ কৰা হয়।

ইতিহাস

অসমত মাধ্যমিক শিক্ষাৰ নিৰীক্ষণ, নিয়ন্ত্ৰণ আৰু বিকাশৰ বাবে এক মাধ্যমিক শিক্ষা পৰিষদ গঠনৰ কাৰণে অসম মাধ্যমিক শিক্ষা অধিনিয়ম, ১৯৬১ (The Assam Secondary Education Act, 1961) (Assam Act, XXV of 1961) জাৰী কৰা হয়। অসম চৰকাৰৰ শিক্ষা বিভাগে ১৯৬২ চনৰ ২৯ জানুৱাৰী তাৰিখে প্ৰকাশ কৰা বিজ্ঞপ্তি নং. ১৫৯/৬১/৩৭ৰ যোগে এই অধিনিয়মখন প্ৰথম কাৰ্যকৰী কৰা হয়। এনেকৈ ১৯৬২ চনৰ ১৪ মাৰ্চ তাৰিখে অসম মাধ্যমিক শিক্ষা পৰিষদ (SEBA) প্ৰতিষ্ঠা হয়। ১৯৬২ চনৰ ১১ বছৰীয়া উচ্চতৰ মাধ্যমিক শিক্ষান্ত পৰীক্ষা পৰিচালনাৰে এই পৰিষদে নিজৰ কাম-কাজ আৰম্ভ কৰে। অধিনিয়মখনৰ অনুসৰি অসম চৰকাৰে এচ চি ৰাজখোৱাক (ডি পি আই) অধ্যক্ষ আৰু মঃ এন ইছলামক (বিদ্যালয় পৰিদৰ্শক, মধ্য অসম) সচিব হিচাপে পৰিষদখন গঠন কৰে।

কাৰ্যালয়

পোনপ্ৰথমে শ্বিলংস্থিত অসমৰ ডি পি আই কাৰ্যালয়ৰ কনফাৰেন্স ৰুমত পৰিষদে নিজৰ কাম-কাজ আৰম্ভ কৰে। পাছলৈ গুৱাহাটীৰ ৰিহাবাৰীৰ এটা ভাড়াঘৰলৈ পৰিষদৰ কাৰ্যালয় সলনি কৰা হয়। এই ভাড়াঘৰত পৰিষদে ১৯৬২ চনৰ ১ জুনৰপৰা ১৯৬৩ চনৰ ২৬ ফেব্ৰুৱাৰীলৈকে কাম-কাজ চলাই নিয়ে। তাৰ পাছত গুৱাহাটী বিশ্ববিদ্যালয়ৰ পাণবজাৰত থকা পুৰণি বিশ্ববিদ্যালয় পৰিসৰলৈ (তেতিয়াৰ কটন কলেজৰ নতুন ছাত্ৰাবাস পৰিসৰ) পৰিষদৰ কাৰ্যালয় নিয়া হয় আৰু ইয়াতে ১৯৬৩ চনৰ ২৭ ফেব্ৰুৱাৰীৰপৰা ১৯৭৬ চনৰ ১৫ জানুৱাৰীলৈকে পৰিষদে কাম-কাজ চলায়। পৰিষদৰ অধ্যক্ষ, শিক্ষা বিষয়াসকল আৰু মূল্যাংকন বিষয়াসকলৰ কাৰ্যালয়সহ পৰিষদৰ এটা অংশ ১৯৬৫-৬৬ চনৰ সময়ছোৱাত ভগৱতী প্ৰসাদ বৰুৱা ভৱনত অৱস্থিত আছিল। গুৱাহাটীৰ বামুণীমৈদানত নিৰ্মিত অসম আৰ্হিৰ ভৱনলৈ ১৯৭৬ চনৰ ১৬ জানুৱাৰীত পৰিষদৰ কাৰ্যালয় স্থানান্তৰ কৰা হয়। এই উপলক্ষে অসমৰ তেতিয়াৰ শিক্ষামন্ত্ৰী এইচ এন তালুকদাৰক অধ্যক্ষ আৰু তেতিয়াৰ মুখ্যমন্ত্ৰী শৰৎ চন্দ্ৰ সিংহক মুখ্য অতিথি হিচাপে লৈ উদ্বোধনী অনুষ্ঠানৰো আয়োজন কৰা হয়। ১৯৬৫ চনত অসম চৰকাৰে পৰিষদলৈ ৬ বিঘা মাটি আগবঢ়ায় আৰু এই মাটিতে বৰ্তমানৰ ভৱনটো নিৰ্মিত। তদানীন্তন শিক্ষামন্ত্ৰী ডি কে বৰুৱাই ৯৯ বছৰলৈ লীজত পৰিষদলৈ এই মাটি আগবঢ়াইছিল। বৰ্তমানৰ ১৫৭৫ বৰ্গ কিলোমিটাৰৰ কেইবামহলীয়া ভৱনটোৰ ১৯৮৯ চনত নিৰ্মাণ সম্পন্ন হয়।

পৰিষদৰ কৰ্মপৰিসৰ

পোনপ্ৰথমে সমগ্ৰ উত্তৰ-পূৰ্বাঞ্চল সাঙুৰি অবিভক্ত অসম SEBAৰ কৰ্মপৰিসৰ আছিল। পাছলৈ বিভিন্ন সময়ত অসমৰপৰা ফাটি মেঘালয়, নাগালেণ্ড, মণিপুৰ, মিজোৰাম, ত্ৰিপুৰা আৰু অৰুণাচল প্ৰদেশ গঠন হোৱাত আৰু প্ৰতি ৰাজ্যৰ নিজৰ শিক্ষা পৰিষদ গঠন হোৱাত SEBAৰ কৰ্মপৰিসৰ হ্ৰাস পায় আৰু বৰ্তমানৰ অসম ৰাজ্যত ই কাম-কাজ চলাই নিয়ে।

বাহ্যিক সংযোগ

• বিদ্যালয় শিক্ষা পৰিষদ Archived 2012-02-12 at the Wayback Machine

তথ্য সংগ্ৰহ

• SEBAৰ ৱেবছাইট Archived 2022-04-12 at the Wayback Machine