|
Chaime I d'Aragón
Chaime I o Conqueridor (2 de febrero de 1208-27 de chulio de 1276) naixito de Montpeller y muerto en Alchezira. Yera fillo de Pero II d'Aragón y de María de Montpeller, descendient de l'emperador bizantín Isac I Comneno. En a Cronica de Sant Chuan d'a Penya comentan que ye descendient d'emperadors bizantins: [...] la filla del noble princep Don Guillem de Montpeller clamada María, nieta del Emperador de Costantin noble, de la cual procreó un fillo que fué nombrado Jaime. Et por aquesti ajustamiento matrimonial peruino la baronía de Montpeller a Rey de Aragon.
Cuan morió Pero II teneba 6 anyos y yera en o poder de qui venció a su pai, Simón de Montfort. Lo puyoron a la cadiera reyal a os 11 anyos y lo declaroron mayor d'edat. A os 22 escomenzó a conquiesta de Mallorca o 31 d'aviento de 1229. En 1230 prenió a isla y en 1232 fue reconoixito por os moros de Menorca y tres anyos dimpués conquerió Ibiza. Repartió as tierras a os caballers que l'heban aduyato en a conquiesta que yeran, amás gran parte, catalans de l'Ampurdán. Dende 1232 dica 1245 conquerió o Reino de Valencia. Cuan remató a conquiesta achustó con Fernando III o Santo o Tractau d'Almizra (1244) a on se fixoron as mugas d'as espansions d'as coronas d'Aragón y Castiella. En a política exterior yera muit cheneroso. En o Tractau de Corbeil cedió a Loís IX de Francia os territorios dillá d'os Pireneus. Yera Chaime I un hombre royo, de uellos foscos, valient, cheneroso y cruel. Tenió tres mullers lechitimas en a suya vida. Con 13 anyatas feitas se casó con Alionor de Castiella, filla d'Alifonso VIII. En 1235 se caso con Violant d'Hongría, filla d'Andreu d'Hongría con a que tenió tres fillos y tres fillas. Dimpués de morir Violant, se casó en secreto con Teresa Gil de Bidaurre, que agafó a lepra y la quiso repudiar pero no lo consiguió. Mandó arrancar a luenga a Frai Berenguer de Castellbisbal, bispe de Chirona por charrar sobre o suyo matrimonio con Teresa. Estió un gran amant d'a luenga catalana y ordenó que s'escribise tot en luenga vulgar. Escribió o Llibre dels feyts. En Aragón, Catalunya y Valencia le succedió Pero III y, en Mallorca, o suyo atro fillo Chaime.
|
