|
Castiello de Troncedo
O castiello de Troncedo ye un castiello medieval d'Aragón que se troba en o lugar de Troncedo, en o municipio d'A Fueva (comarca de Sobrarbe), y a provincia de Uesca. Troncedo ye una localidat que se troba en l'extremo sud-oriental d'a subcomarca natural que ye A Fueva, fendo de muga con Ribagorza baixa. O castiello de Troncedo se troba en un garrot en alto d'un cerro que fa parte natural d'a sierra de Campanué u d'o Turón, en as espuendas en dreita d'o barranco d'o Salinar, en una posición de tot avantallosa ta cosirar o paso mas frecuent y comodo que siempre ha gosau existir entre a ribera de Graus (Ribagorza) y o sector mas sud-oriental de Sobrarbe. A suya importancia estratechica se confirma con a linia visual que mantiene con l'asentamiento fortificau de Muro de Roda y con os castiellos de Sant Mitier.[1] En a suya construcción s'aprofeitó a penya que de natural feba sallent alto d'o barranco como base ta lo recinto amurallau, fendo sumar ista defensa natural a las que se i construyoron. O recinto s'estructura en una era en cantimplano, en un recuesto a on que a penya forma cillos en a mayoría d'o suyo perimetro, treito de o costau norte que contacta con o nuclio urbano, que se troba habilment bloqueyau con a torre de l'homenache. A torre de l'homenache ye a construcción mas visible d'o castiello, y con él, de tot Troncedo. S'ha puesto conservar dreita dica l'actualidat. Se tracta d'un edificio imponent,[1] anque ha gosau perder tot o suyo interior, conservaba dreitos os muros que le daban perimetro pentagonal, anque con graus espaldaturas en o canto sud-occidental.[1] A torre fa mas de 10 metros d'altaria, y en a part d'alto se conservan 5 finestras (una por cada costau d'a torre) que probablement teneban misión defensiva. Se'n guarda documentos que dan referencia d'a suya importancia ya en o reinau de Sancho lo Mayor,[1] en una epoca que cal entender que encara no s'heba reconquiesto a villa de Graus, y por ixo heba de representar un valuart principal en a defensa d'ista part d'os territorios cristianos, en estando a primer fortificación que, malas que una expedición musulmana mirase d'invadir por A Fueva, se concararía con ella. En l'anyo 1152, Remiro II lo Monche les ne cedió a o bispau de Roda d'Isabana,[2] el que puede interpretar-se como una disminución d'a suya importancia ta cuan ya s'heba reconquiesto as poblacions en sud de A Fueva. O Castiello de Troncedo fa parte, en chunto con os castiellos de L'Abizanda, d'Escanilla y Sant Mitier, d'el que cualques autors han dau a clamar linia de defensas exteriors de Sobrarbe. Imáchens
Se veiga tamién
Referencias
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
