an Bos taurus

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo ye sobre o toro, ta la localidat zamorana de Toro, se veiga Toro (Zamora).

Vaca

Bos taurus, a vaca domestica

Estato de conservación

Domestica.

Clasificación scientifica

Dominio:	Eukaryota
Reino:	Animalia
Filo:	Chordata
Clase:	Mammalia
Orden:	Artiodactyla
Familia:	Bovidae
Subfamilia:	Bovinae
Chenero:	Bos
Especie:	taurus

Nomenclatura binominal

Bos taurus

Linnaeus, 1758

Subespecies

A vaca (d'o latín < VACCA^[1]) (Bos taurus (L., 1758)) ye un mamifero domestico de grans dimensions, estendillato per toz os continents dintro de dos d'as suyas subespecies: a vaca europea (subespecie Bos taurus taurus) y lo cebú (Bos taurus indicus).

D'entre lo bestiar bovino son inclusas as subespecies B. taurus taurus (d'o latín taurus, toro) y B. taurus indicus (o cebú, a vaca sagrada d'a India). Os masclos fertils d'esta especie son ditos toros y anque prou mes escasos que no las fembras (vacas propiament ditas), gosan estar posatos como sementals en a ramata d'entre os meses de marzo y d'abril, ta cubrir-las perque ye cuan as fembras son marrideras. Siga en raza de leite u paixenteras (destinatas ta fer-ne carne), ye important de tener-los deseparatos ta que no s'enristan entre éls en ixa epoca.

As fembras gosan estar mes pacificas, anque son famosas per estar capezutas cuan no quieren fer cosa, dica lo punto que cal enrestir-las con os cans u fustiyar-las ta fer-las andar.

Bel masclo, sobretot ta las fayenas d'antes, yera capato en a suya adolescencia ta fer-los marchar mes mansos. D'ixa manera s'obteneban os bueis. Actualment, a castración només s'aplica a os vetiellos en a industria carnica per tal d'evitar que les apareixcan os nivels mes altos de textosterona en l'adolescencia, que fan, entre altras cosas, que la carne se torne mes dura. De maniera mes cheneral, a parola buei tamién puet estar emplegata ta toz os bovins (usualment salvaches) de mida gran, como os gaurs u bantengs d'Asia.

As crías d'este animal se dicen vetiellos/as u vediellos/as en a forma que sonoriza ixa "T", tamién existe a forma arcaica vetiechos/as

Orichen d'a especie

Bi ha una gran controversia arredol d'o tema. Encara que os investigadors no plegan enta garra alcuerdo, se'n consideran dos hipoteticos orichens:

Orichinalment, totas as variedaz bovinas actuals son descendentas de l'uro (Bos primigenius u B. taurus primigenius en a nomenclatura actual) lo cual podeba haber feito puesto a cualque subespecie intermedia (B. taurus brachyceros), lo qui presuntament habría dato las variedaz actuals.
Diversas poblacions prehistoricas d'Uros primitivos (d'os cuals, no se'n tiene fosils), evolucionando de maniera paralela, habrían feto puesto a lo B. taurus primigenius que se conoix, y lo B. t. brachyceros. Ixas dos especies habrían dato pues as subespecies actuals. D'acuerdo con este modelo a subespecie africana Bos primigenius hahni sería l'antecesora d'as razas bovinas africanas y de bella raza de color royisca d'a Peninsula Iberica.

Aptituz

Esta especie s'emplega regularment en a producción de leit y carne, anque en bel país encara tiene importancia como bestia d'estira.

A demés, en muitos puestos d'Iberoamerica, Espanya, Portugal, Francia u os Estaus Unius s'emplega encara como bestia en espectaclos taurinos

Biolochía

As vacas son animals remugants. Ixo significa que tienen un sistema dichestivo especialment adaptato ta la dichestión d'alimentos a partir d'os cuals altras especies animals no en podrían quitar cosa. A remuga ye, de feito, a devuelta d'os alimentos de l'estomago enta la boca ta continar con o suyo proceso de mastigación.

O sistema dichestivo d'a vaca ye evolucionato ta formar tres cavidaz, ditas popularment estomagos, que no en son tals, y se sitúan d'antes no lo un verdadero, dito abomaso. As cavidaz se claman reticlo, rumen y omaso. Adintro d'o rumen, que ye la una de mes gran mida, viven microorganismos (bacterias, protozoos y fongos) anaerobicos que fan simbiosi con l'animal. Son estes os qui tienen a capacidat de dicherir os hidratos de carbonio (como la celulosa u l'acido fitico (fuent important de fosforo vechetal, que sien d'éls a vaca no podería aproveitar). En a relación de simbiosi, a vaca les proveye l'alimento y un ambient favorable ta que medren.

Sonius

Un soniu tipico d'esta especie ye o gramito, bramido^[2], bramiu^[2], bramizo^[2], esgramaco^[3] u esbramec^[4]^[5], y l'acción de fer este soniu se diz bramar^[2], esgramucar^[6], esbramucar^[6], esbramugar^[2], esbramegar^[4]^[5], u esgramaquiar^[3], verbos que derivan d'o latín BRAMARE^[7], que ye un goticismo primerenco en latín.

Recensada mundial

Bi ha aproximadament 1.300 millons de cabezas bovinas en o mundo, en l'anyo 2009, d'os cuals 250 millons son cebús.

O continent con a mes gran cantidat de bovins ye America, con bels 450 millons, encorrito per Asia (con 300 millons), Europa (270 millons), Africa (160 millons) y Oceanía (con 50 millons).

Region	Cattle population
India	281,700,000
Brasil	187,087,000
China	139,721,000
Estaus Unius	96,669,000
Unión Europea	87,650,000
Argentina	51,062,000
Australia	29,202,000
Mexico	26,489,000
Federación Rusa	18,370,000
Republica Sudafricana	14,187,000
Canadá	13,945,000
Atros	49,756,000