|
Bogomilismo
O bogomilismo estió un movimiento relichioso que amaneixió en Bulgaria en o sieglo X arribó en Costantinoble y talment tamién en Bosnia (on i heba una ilesia heretica dende o sieglo XII), dende a on s'estendilló ta Occident plegando ta Italia y Occitania a prencipios d'o sieglo XII. Os bogomils occitans fuoron conoixitos como cataros chunto con suyos succesors os albichenses u cataros radicals. A doctrina bogomila no ye dualista de tot pus consideran que o diaple no ye o creyador y no ye que un organizador d'o mundo (un “arquitecto”). En as amostranzas bogomilas amaneixen de nuevo antigas doctrinas cristianas que estioron ortodoxas antigament como o traducianismo, a concepción y a naixencia auriculars de Cristo. Atras creyencias d'os bogomils encara que no yeran ortodoxas, teneban muita antigüidat, como o fantasianismo doceta. O bogomilismo fue concebito por relichiosos bizantins ultraconservadors, encratitas y vechetarians. En o "Libro de los Emperadors" parlan sobre l'orichen d'o bogomilismo: En aquel tempo un heretge clamado Vassilioti el cual cuasi levava el ábito del diablo, e sus diciplos se clamavan bogomili. Aquesti Vassilioti ha apreso aquella malvada doctrina dentro XV anyos, e aprés ha predicado por el mundo LII años. El cual ha feito perder las ánimas a muitos con su falsa doctrina. Finalment fue a Contastinoble do fue castigado cuando l'emperador fue enformado de sus malas obras...
O bogomilismo occitán desapareixió en 1167 cuan un ninviato de Costantinoble convenció a los bispes bogomils occitans pa que se pasasen ta atra herechía que yera dualista radical, os albichenses. En o norte d'Italia i habrá bogomils dica o sieglo XV, teneban o suyo centro en Concorezzo (Lombardía) y los albichenses lis deciban "bulgaros". Dimpués d'a persecución y as mortaleras d'as comunidaz albichenses en o sieglo XIII bels albichenses occitans se convertirán a lo bogomilismo en o sieglo XIV. A Ilesia de Bosnia, heretica encara existiba en o sieglo XV y defendeba un dualismo radical. Bibliografía
|
Portal di Ensiklopedia Dunia
