an Arctodus

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Arctodus
Cranio d'Arctodus simus
Rechistro fósil	Dende o Plioceno dica o Pleistoceno
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Mammalia
Subclase:	Theria
Orden:	Carnivora
Suborden:	Caniformia
Familia:	Ursidae
Subfamilia:	Tremarctinae
Chenero:	Arctodus
Descripción
Arctodus Leidy, 1854

Arctodus (Leidy, 1854) ye un chenero de mamiferos carnivoros extinctos adentro d'a familia Ursidae y a subfamilia Tremarctinae que habitón en America d'o Norte entre as zaguerías d'o Plioceno y a zaguer glaciación, a finals d'o Pleistoceno.

Descripción

Os onsos Arctodus teneban un cranio amplo y o mueso mas curto que os onsos actuals, razón por a cual se les diz «onsos de cara curta». Tamién teneban as muelas carnuceras punchudas, como os canidos, os felidos y atros carnivoros, adaptadas pa trinchar a carne y no pas aplanadas y aptas pa masticar como a resta d'os ursidos. Tradicionalment se pensaba que yeran onsos de tot carnivoros, pero estudios recients d'a suya dentadura, tanto moleculars como de microscopía, han contrimostrau que tamién consumiban vechetals muit a sobén y por ixa razón teneban acumulacions de sarro dental y mesmo dica caries,^[1]^[2] lo cual ye caracteristico d'una inchesta elevada de polisacaridos.

O esqueleto post-cranial tamién teneba cualques diferencias con os ursidos ursins, como as patas mas largas pero mas finas, menos robustas,^[1] lo que les daba mas altura. Se piensa que esto podeba estar una adaptación a la cursa u pa caminar distancias mas largas, lo cual s'ha quiesto veyer como un indicio mas d'una forma de vida probablement mas depredadora que atros onsos. Manimenos, como no queda garra onso de caracteristicas pareixidas, no puede saber-se de seguro. Bels autors afirman que a morfolochía de l'esqueleto post-cranial no ye compatible con o tipo atletico d'atros carnivoros depredadors d'éxito, como os canidos y os felidos, y por contra sí que tiene semellanzas con os hienidos,^[3] que son por principal carnuceros.

Considerando que en o Pleistoceno d'America d'o Norte i heba una gran abundancia de grans depredadors (felidos de dients de sabre, lions, lobos grisos, lobos chigants, cuons y mesmo una subespecie chigant de chaguar, pero que no se conoix garra carnucero terrestre de mida gran (rol que chuegan as hienas en o Viello Mundo), se considera que os onsos de cara curta podeban ocupar chusto ixe nicho ecolochico y que precisament podeban aprofeitar as suyas mesuras pa practicar o cleptoparasitismo,^[3] sacando-les as presas a atros depredadors.