Almendrón
Un almendrón ye una roca sedimentaria detritica formada por ruellos de glera u cantals unius por un cemento de precipitación quimica y a vegadas una matriz. Se considera almendrón cuan os fragmentos de roca son mayors de 2 mm, mayors que los de l'arena. Un ambient tipico de sedimentación d'almendrons son os ríos, quedando a man de l'antigo cauz por fer falta mes enerchía pa mover os ruellos que l'arena, o limo u l'archila. Os almendrons con cantals angulosos han sedimentau en ambients continentals de semontano por l'acción de torrents. En a depresión d'Ebro ha estau tipica a sedimentación en as marguins de cuenca de ruellos de glera y cantals traitos por ríos dende os Pireneus, Sistema Iberico y as Catalanides. Os almendrons que n'han resultau s'han cementau con carbonato calcico, y han desembolicau un modelau en mallos por a disolución d'este carbonato a favor de diaclasas verticals. Esto se vei en os Mallos de Riglos, Mallos d'Agüero, sierra de Santo Domingo, Los Fayos, La Pesquera (Beceit) y Roques del Masmut (Penyarroya). En a compleganza d'o río Martín se reculle a denominación de piedra de haba,[1] que puet estar un leyonesismo introduciu por os meners asturianos y leyoneses que conoixerían a denominación de piedra de faba en astur-leyonés. Referencias
|
Portal di Ensiklopedia Dunia