|
Tortiella de trunfas
A tortiella de trunfas ye un plato popular, d'orichen muit humilde y d'amplia distribución arredol d'a peninsula Iberica, as islas Balears, y Occitania. Actualment tamién se mincha en as Islas Canarias y, a sobén como producto envasau, en muitos países europeus. Se prepara freyindo en aceite d'oliva as trunfas peladas y talladas en trocez u laminas, a sobén tamién con cebolla tallada y a vegadas con bel allo. A parti, se baten os uevos. Dimpués s'adhiben as trunfas escorridas a os uevos, se remena y a mezcla se chita a la sartaina sin tornar a remenar-ne, primero se fa d'un costau y dimpués de l'atro. A proporción de trunfas y uevo no ye fixa y puet variar licherament seguntes os gustos y a zona, pero gosa estar arredol d'un kilo de trunfas, u cuatre trunfas grans, por cada meya docena de uevos. As tortiellas de trunfas tamién se pueden preparar mas u menos gordas a o gusto. Bi ha variedaz d'ista tortiella que portan allo y atras sin de cebolla. A tortiella de trunfas se troba en bellas tabiernas y chicoz restaurants como tapa, pincho u farsiu d'entropán. Se presenta normalment en forma d'una sección de tortiella gorda dencima d'un platet con una chicota forqueta. Se puet fer tamién servir como canapé tallando-la a daus y punchando cada dau con un escavadients. Encara que se conserva muito tiempo sin refricherar, a lei actual obliga a guardar-la refricherada y a utilizar uevos esterilizaus en istos establimientos, ta disminuyir o riesgo de salmonelosi. Istas tortiellas se pueden preparar substituyindo parti u toda a trunfa por carbaceta, alberchena, pimento u atras hortalicias. Se veiga tamién
|
|||||||||||||||||||||||||||
Portal di Ensiklopedia Dunia
