Sufixo -esa

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Lo sufixo -esa deriva de lo sufixo griego atono -ισσα , -issa, que fue adaptau en latín tardano en a forma -issa como tonico por tener dos consonants seguidas dimpués de la penultima vocal.[1] En la suya evolución ta las luengas romances occidentals cambió la i por e d'acuerdo con la evolución vocalica en lo sistema vocalico de lo latín vulgar, y se presenta en aragonés como -esa. La forma orichinal de lo sufixo en latín -ISA se troba en cultismos:[1] profetisa,[2][3] poetesa, pitonisa.

No s'ha de confundir lo sufixo -esa de dignidat feminina con la forma femenina de lo sufixo formador de chentilicios -és derivau de lo latín -ENSIS: aragonesa,[1] leyonesa.

Eixemplos d'emplego

En aragonés medieval se documenta:

• Abadesa.
• Bailesa.
• Contesa.
• Deesa / diosesa.
• Duquesa.
• Maestresa.
• Monarquesa.
• Princesa. Ye un probable galicismo por estar lo feminín de prince y no de princep.
• Sacerdotesa.

Bi ha cierta competencia con lo sufixo -driz en las traduccions medievals: idolatresa en lo "Libro de los Emperadors" y idolatriz en lo "Libro de Marco Polo", emperadoresa como galicismo en lo "Libro de las Marabillas de lo Mundo" y emperadriz en cheneral en los textos medievals.

En las parlas altoaragonesas actuals se documenta:

• Alcaldesa.
• Guardiesa.
• Mairalesa.[4]
• En la parla de bella val como Chistau lo sufixo -esa s'anyade a lo nombre de la casa como denominación aplicada a cadaguna de las mullers d'ixa casa: Chaimesa, Casanovesa,[5] ecetra.

Comparanza con atras luengas romances

Una de las luengas romances a on que mes s'emplega este sufixo ye en francés, sobre tot en feminins irregulars de palabras que acaban en -e en masculín:[6]

• Abbé > abbesse.
• Âne > ânesse.
• Bonze > bonzesse.
• Bougre > bougresse.
• Chanoine > chanoinesse.
• Comte > comtesse.
• Diable > diablesse.
• Druide > druidesse.
• Hôte > hôtesse.
• Maître > maîtresse.
• Ogre > ogresse.
• Pape > papesse.
• Prêtre > prêtresse.
• Prince > princesse.
• Tigre > tigresse.
• Vicomte > vicomtesse.
• Poète > poétesse.
• Prophète > prophétesse.
• Chef > cheffesse.

Mesmo en adchectivos substantivables y chentilicios:

• Drôle > drolesse.[6]
• Mulâtre > mulâtresse.[6]
• Nègre > negresse.[6]
• Pauvre > pauvresse.[6]
• Sauvage > sauvagesse.[6]
• Suisse > suissesse.[6]
• Traître > traîtresse.[6]

Bi ha substantivos acabaus en -eur que tienen femenins en -esse formando secuencias -eresse y -oresse:[6]

• Bailleur > bailleresse.
• Chasseur > chasseresse (nomás que en contextos mitolochicos como Diane chasseresse).
• Défendeur > défenderesse.
• Enchanteur > enchanteresse.
• Pêcheur > pêcheresse.
• Vengeur > vengeresse.
• Docteur > docteresse.

Referencias

1. (es) David A. Pharies: Diccionario Etimológico de Los Sufijos Españoles: Y de Otros Elementos Finales Volumen 25 de Biblioteca románica hispánica. Editorial Gredos, S.A., 2002 pp 235-236 ISBN 8424923391, 9788424923396.
2. (an) Vidas semblants.
3. (an) Cronica de los Conquiridors
4. (es) Xavier Tomás Arias: El aragonés del Biello Sobrarbe. Instituto de Estudios Altoaragoneses, 1999. p 265.
5. (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. ISBN 978-84-8094-061-0 p 154, p 184.
6. (es) Ortografía francesa. Larousse Editorial, S.A, 1999., pp 56-59.

Bibliografía

• (es) David A. Pharies: Diccionario Etimológico de Los Sufijos Españoles: Y de Otros Elementos Finales Volumen 25 de Biblioteca románica hispánica. Editorial Gredos, S.A., 2002 ISBN 8424923391, 9788424923396.
• (es) Xavier Tomás Arias: El aragonés del Biello Sobrarbe. Instituto de Estudios Altoaragoneses, 1999.
• (es) Gramática francesa: Larousse Editorial, S.A, 2000.
• (es) Ortografía francesa: Larousse Editorial, S.A, 1999.
• (es) Jesús Cantera y Eugenio de Vicente: Gramática francesa. Editorial Cátedra, S.A., 1999.

• Datos: Q65395860