Provincia de Lidje
A provincia de Lidje (francés: Province de Liège, neerlandés: Provincie Luik, alemán: Provinz Lüttich) se sitúa a l'este de Belchica, en a Rechión Valona, y muga con Luxemburgo, Alemanya y os Países Baixos. A provincia tien 1.016.762 habitants en un territorio de 3.862 km², repartitos en 84 communes (municipios) distribuitos a la vegata en cuatre arrondissements (districtos) : Lidje, Vervî, Hu y Wareme. L'este d'a provincia perteneixeba, antis de 1920 y d'o Tratato de Versailles, a Alemanya (municipios d'Eupen, Malmedy y Sankt Vith). Lidje ye a la vegata a capital d'a provincia y a suya ciudat mas important a ran economico y cultural. A provincia disposa d'un important rete d'autopistas enta as grans ciudatz belgas y os países vecins asinas como una connexión TAV (Thalys) con Bruselas y Alemanya. O puerto autonomo de Lidje y l'aeropuerto de Bierset (Lidje) son tamién dos importants ferramientas lochisticas en proceso de realización. O gubernador d'a provincia ye Hervé Jamar dende l'1 d'octubre de 2015. Ista provincia tien nueu communes (municipios) de parla alemana (que forman a Comunidat de parla alemana) situatas a l'este d'a provincia. A rechión chermanofona ye incluyita en o districto de Vervî, que poseye alto u baixo 70.000 habitants en una superficie de 854 km². Cal parar cuenta que dos municipios tienen lo que se diz “facilidaz lingüísticas”. Ye decir, que encara que sían francofonos, os ciudadans pueden exprisar-se en alemán con as administracions publicas. Se tracta d'os municipios de Waimes y de Malmedy. Vinclos externos
|
Portal di Ensiklopedia Dunia