|
Paramo de Barracas
Lo Paramo de Barracas ye una plana alta entre los 600 m y los 800 m a on se situan las poblacions de Barracas, Toro y Ferragudo (Alto Palancia, Castellón). Este paramo ye una continación natural de las parameras u altiplanos de lo sud de la provincia de Teruel en plena provincia de Castellón. Los cabos d'esta paramera son la Sierra de Pina, la Sierra d'El Toro y la Cuesta de Ferragudo. Un de los pocos puntos que resaltan en meyo de lo paramo de Barracas ye l'Alto d'el Mazorral con 1112 m, entre los termins municipals d'El Toro y Barracas. Una part d'este paramo desaugua en lo río Millars a traviés de lo suyo afluent río Maimona u Barruezo. La part occidental d'este paramo presenta altarias entre 1000 y 1100 m y desaugua a traviés de torrents y barrancos enta lo río Palancia, que naixe en Penya Escabia y que fa una important erosion remontant. La marguin sudueste de lo paramo de Barracas ye la Cuesta de Ferragudo, un gran ripa de 200 m de deslivel y 500 m d'amplaria y a on s'atura esta erosión remontant.[1] En materials mesozoicos que fan part de la Sierra de Chabalambre como unidat cheolochica bi ha un corro de poljes entre Barracas y Alcotas con alargamiento en dirección nord-este-sudueste y con campos de dolinas. Son poljes ensopinaus por lo ret fluvial y dificils de localizar. Lo polje de Barracas cuasi enlaza topograficament con las planas de la depresión de La Puebla de Valverde-Sarrión[2] En la Edat Meya bi heba dos importants duanas que controlaban lo comercio entre los reinos d'Aragón y Valencia: Las Barracas de los Chaqueses en territorio aragonés y Barraques dels Reals en territorio valenciano, talment reflectando las monedas en curso en cada reino (la moneda chaquesa en Aragón y lo reyal en lo Reino de Valencia).[3] Referencias
Se veiga tamién
|
