- Iste articlo ye sobre una cinta estausunidense de cine de drama biografico politico de l'anyo 2010; ta atros usos, se veiga Fair Game y Fair Game (cinta).
Fair Game (títol orichinal en anglés, en aragonés Chuego limpio, enguerada en Aragón con o títol en castellano de Caza a la espía) ye una cinta de cine biografico dramatico-politico de l'anyo 2010 coproducida por o cine estausunidense y lo cine emiratí dirichida por Doug Liman seguntes un guión adaptau por Jez Butterworth y John Butterworth (basau en Fair Game, as memorias de Valerie Plame, y enThe Politics of Truth, de Joseph C. Wilson), con una banda sonora orichinal de John Powell, una dirección de fotografía de Doug Liman y una producción cinematografica de Jez Butterworth, Akiva Goldsman, Doug Liman, Bill Pohlad, Jerry Zucker y Janet Zucker ta las productoras Participant Media, River Road Entertainment, Weed Road Pictures, Hypnotic, Zucker Productions y Imagenation Abu Dhabi FZ. L'elenco d'actors d'a cinta ye formau, en os principals papels, por Naomi Watts, Sean Penn, Noah Emmerich, Ty Burrell, Sam Shepard, Polly Holliday, Bruce McGill, Brooke Smith, Michael Kelly, Liraz Charhi, Khaled El Nabawy, Anand Tiwari, David Denman, David Andrews y Geoffrey Cantor.
Fair Gameconta la historia real de Valerie Plame, una achent d'a Central Intelligence Agency estausunidense que treballa en un departamento adedicau a la investigación sobre la no proliferación d'armas nucleyars y a qui encomanan una investigación concreta sobre un presunto programa de fabricación d'armas nucleyars por Iraq. D'atra man, ninvían a su mariu, lo diplomatico Joseph C. Wilson, a Nícher ta comprobar si este país ha vendiu a Iraq uranio enriquiu ta ixe mesmo programa de fabricación d'armamento nucleyar. Toz dos, por separau, arriban en a conclusión razonada de que no existe ixe programa, cosa que se confirma por todas as fuents posibles. Tanimientres, o Gubierno d'os Estaus Unius dirichiu por George Walker Bush afirma contra toda evidencia la veracidat d'ixe programa, en basando-se, dicen, en as informacions de Valerie Plame y Joseph C. Wilson, y con ixa desincusa declaran a guerra a Iraq. Joseph C. Wilson decide publicar a verdat en un articlo en o diario The New York Times, pero lo Gubierno contraataca en difamando por toz os medios posibles a lo matrimonio.
A cinta s'ambienta en l'anyo 2003 en Malaisia, Iraq, Nícher y Washington, DC en Estaus Unius y las suyas escenas se filmoron en Ammán en Chordania, en Echipto (incluyiu o Caire), en Malaisia (incluyiu Kuala Lumpur, en Iraq (incluyiu Bagdad) y en Nueva York y White Plains en Nueva York y en Washington, DC en Estaus Unius.[2] Ye una cinta que ha recibiu bels premios y nominacions, pero garra d'istos premios fa parte d'os premios cinematograficos mas conoixius.
Se veiga tamién
Referencias
Vinclos externos
