an Turdus merula

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Turdus merula
Masclo de Turdus merula.
Denominacions populars
Merla, mierlo, chorda, mierlo, torda negra, tordo pardo, torla ^[1]
Estau de conservación
Seguro (IUCN)
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Aves
Orden:	Passeriformes
Familia:	Turdidae
Chenero:	Turdus
Especie:	T. merula
Descripción
Turdus merula LINNAEUS, 1758
Distribución cheografica
Distribución. Verde fusca = resident. Verde clara = estival. Amariella = hibernal. Marrón = introducida.

A merla común (nombre cientifico: Turdus merula (L., 1758)) ye una especie d'au paseriforme d'a familia Turdidae; unas d'as millor reconoixibles d'o chenero Turdus por tener os masclos o plumache de color negra intensa y, en temporada de reproducción,^[2] o pizco y os parpiellos amariellos u naranchas vivos.

Descripción

A merla ye un paixaro d'arredol de 25 cm de largaria y entre 75 y 120 gramos de peso,^[2] sin diferenciar-se os sexos por a mida.

Os masclos adultos destacan por as plumas negras y brillants que tienen y por tener o pizco y os parpiellos (vistables con a forma d'un disco arredol d'o uello) de color amarellisca u narancha, que reviscola en a temporada nupcial. As fembras y os chóvens son de color marrón discreta,^[2] prou lisa, anque en bel eixemplar puet presentar-se piquetas d'una tonalidat marrón una mica mas fusca y mas u menos vistables contra la resta.

Alimentación

Como todas as tordas, a merla ye omnivora pero prefiere os insectos, cucos y atros ivertebraus como limacos y caragols. Tamién mincha fruitos, como bayas y drupas que pilla entre as bardas y matullos por a on que gosa esbulligar. Eventualment tamién caza vertebraus chicorrons, como ranuecos y engardaixinas.^[2]

Habitat

A merla ye una especie de selva que s'ha adaptau a muitos atros habitats, como parques y bardas en arias urbanas, sin guaire dificultat. Necesita que i haiga buena cobertura d'árbols.^[2]

Ye una especie territorial, que defensa y marca lo suyo territorio con o cantao, de regular de maitins y en a tardada.^[2] Os masclos defensan agresivament lo territorio contra las intrusions d'atras merlas y dica atras especies de paixaros.

Fa o niedo bien amagau entre os arbustos, as hiedras u menos vegadas en a corona d'os árbols. A cobada gosa estar feta de 5 uevos que coba la fembra.^[2]