Trallo (tronco)

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Pa atros usos de trallo se veiga Trallo (desambigación).

Trallos de pins y atras coniferas.

De forma cheneral, en o vocabulario d'a fusta, un trallo ye un tronco de forma mas u menos recta y que ya s'ha desbrozau (se le han sacau as ramas) y ye presto pa tirar-lo fuera d'a selva u pa serrar. I ha tot un vocabulario especifico d'os trallos en función d'a mida u a forma que tienen.

Tipos de trallos

Tradicionalment, en l'Alto Aragón os trallos se mesuraban en palmos aragoneses. D'aquí dimana tot un vocabulario que se basa en os multiplos d'esta mesura tradicional: docens, trecens, secens, trentens, trentaseisens, cuarantens, cincuentens y os mas grans de toz, os sesentens. En una capitulación sinyada en 1589 en Chaca i trobamos:

[...] los sezenes que hayan de tener y tiengan veinte y cuatro pies de catorze puntos de agujero a agujero, y los catorzenes de veinte y un pie de a onze puntos de agujero a agujero, e los dozenes de a diez y nuebe pies de a onze puntos de agujero a agujero.[1]..

En o mundo d'as navatas, os trallos «s'escuadraban» enantes de ligar-los en un trampo, de forma que perdeban a sección cilindrica y por contra se les feba unas caras laterals aplanadas antes de transportar-los. Estas se deciban «cara» as d'alto y abaixo, y «canto» as laterals.[1] De regular a cuadratura no yera exacta y as «caras» yeran un poquet mas amplas que os «cantos».

Por eixemplo, os navaters de Sobrarbe a mediaus d'o sieglo XX emplegaban o siguient vocabulario (d'alcuerdo con Pallaruelo, 2008) pa os trallos por a suya largura:[1]

• Venticuatrén: 24 palmos = 4,5 a 5 metros de largo, 45 centimetros de cara y 40 de canto.[1]
• Cuarantén grande: 40 palmos = 9 metros de largo, 55 cm de cara y 50 cm de canto.
• Cuarantén chico: 8 metros de largo, 50 cm de cara y 45 cm de canto.
• Sesentén: 60 palmos = 12 metros de largo, 60 cm de cara y 60 cm de canto. Un tipo de pieza de tot excepcional.[1]

Entre os trallos que no se denomina en función d'a suya largura tenemos (Pallaruelo, 2008)[1]:

• A Coixera: 6,4 metros de largo, 60 cm de cara y 55 cm de canto.
• O Doblero: 8 metros, 45 cm de cara y 40 cm de canto.

Bels tipos de trallos remataban fendo parte d'as bastidas de tellaus y suelos en os edificios, a modo de bigas y biguetas.

En atros casos, as piezas recibiban nombre en función d'a fayena a la cual se soleban destinar. Asinas en a documentación relacionada con o comercio fluvial d'o Cinca apareixen as entenas, como ixa pieza de l'aparello de velamen d'os vaixiellos de vela, cuairons, fustes y filas, que yeran tipos de bigas, etc.[1] En un documento notarial de Balbastro, en 1598, se diz:

[...] veynte filas de pino buenas y serbidoras, no tuertas, ni quebradas, sabareñas, ni betasegadas, de largueza cada una dellas de veynte y ocho a trenta palmos, de ancheza las dos de ellas de tres palmos a la espiga, y las seis a dos palmos, las otras seis de palmo y furco, y las otras seis de palmo y medio de ancho a la espiga...

Atras mesuras de trallos que s'emplegaba en Sobrarbe en o sieglo XX, replegadas por Pallaruelo en a suya obra Navateros, son:

• O cuadradillo: 5 metros de largo, 20 cm de cara y 18 de canto.
• O cuadradillo de media carga: 8 metros, 20 cm de cara y 18 de canto.
• O filetón: 5 metros, 25 centimetros de cara y 22 cm de canto.
• A fileta: 8 metros de largo, 25 cm de cara y 22 cm de canto.
• A fila de carga: 5 metros de largo, 40 cm de cara y 35 de canto.
• O fusto de carga: 8 metros de largo, 30 cm de cara y 25 cm de canto.
• O fusto de media carga: 5 metros de largo, 30 cm de cara y 5 cm de canto.

Referencias

1. (es) PALLARUELO CAMPO, Severino. Navateros. Ed. PRAMES, Zaragoza, 2008. pp 90-91. ISBN 978-84-8321-256-1

Se veiga tamién

• Tralla.
• Tranca.

• Datos: Q97247953