|
The Silver Chalice (cinta)
The Silver Chalice (títol orichinal en anglés, en aragonés O cáliz d'archent, enguerada en Aragón con o suyo títol traduciu enta lo castellano como El cáliz de plata) ye una cinta de l'anyo 1954 de cine estausunidense de cine de drama epico relichioso de peplum dirichida por Victor Saville seguntes un guión adaptau por Lesser Samuels (basau en a novela The Silver Chalice, publicada l'anyo 1952 por Thomas B. Costain), con una banda sonora orichinal de Franz Waxman, una dirección de fotografía de William V. Skall, una producción cinematografica de Victor Saville ta la suya productora cinematografica Victor Saville Productions y un elenco composau, entre d'atros actors, por Virginia Mayo, Pier Angeli, Jack Palance, Paul Newman, Walter Hampden, Joseph Wiseman, Alexander Scourby, Lorne Greene, David J. Stewart, Herbert Rudley, Jacques Aubuchon, E.G. Marshall, Michael Pate, Natalie Wood, Booth Colman, Terence De Marney, Robert Middleton, Ian Wolfe, Lawrence Dobkin, Philip Tonge, Albert Dekker y Strother Martin. Basil ye un nino que vive en Antioquía con una gran capacidat ta los treballos d'artesanía. Intresau en él, l'adopta un cabalero propietario d'a ciudat pero lo suyo chirmano no ye conforme y, cuan muere lo pai adoptivo, niega que haiga existiu l'adopción y diz que no yera so que una compra d'un esclavo. Dimpués vende a Basil a lo propietario d'un taller d'orfebrería, a on anyos dimpués destaca por a calidat d'o suyo treballo en choyería. Casualment en ixe taller lo troba una muller que ye una mesacha antigament esclava a qui heba aduyau a fuyir d'o suyo amo anyos entazaga. D'atra man, en o taller plega tamién un hombre que quiere fer un encargo bien poco habitual y que merca a Basil en pagando lo doble d'a suya valura. L'encargo ye de fer un cáliz d'archent ta rodiar o cáliz que fació servir Cristo en a Ultima Cena y que dimpués s'emplegó en a crucifixión ta recullir a sangre de Cristo, y ye un encargo de Chusé d'Arimatea. Chusé tien una filla, Debora, que s'enamora de Basil encara que iste parixe estar enamorau d'Helena, l'antiga esclava a qui aduyó a fuyir y que agora ye la parella artistica de Simón o Mago. Simón pretende convertir-se en o fundador d'una nueva relichión que suplante a lo cristianismo y ta ixo quiere destruyir o cáliz (que no ye atra cosa que lo Santo Gredal), estando asinas aliau formal d'o chirmano desleyal que mintió ta fer un esclavo de Basil. Toz marchan enta Roma, a on s'escayecerá lo final d'a historia. A cinta s'ambienta en o sieglo I en as ciudaz d'Antioquía, Cherusalem y Roma y las suyas escenas se filmoron en os Warner Brothers Burbank Studios en Burbank (California).[2] Ye una cinta que ha recibiu bels premios y nominacions, en destacando dos nominacions a los Premios Oscar en a suya 27ena edición, a la Millor Fotografía en Color y a la Millor Banda Sonora Orichinal, y una nominación a los Premios Globos d'Oro en a suya 14ena edición a la Millor Estrela Emerchent Masculina. Elenco[3]
Se veiga tamiénReferencias |
