|
Saddle Tramp (cinta)
Saddle Tramp (títol orichinal en anglés, en aragonés Pinganero en a siella de montar, enguerada en Aragón con o títol d'Alma solitaria) ye una cinta de cine de western de cine estausunidense de l'anyo 1950 dirichida por Hugo Fregonese seguntes un guión orichinal de Harold Shumate, con una dirección de fotografía de Charles P. Boyle y una producción cinematografica de Leonard Goldstein ta la productora cinematografica Universal Pictures. De l'elenco d'actors d'a cinta en fan parte, entre d'atros, Joel McCrea, Wanda Hendrix, John Russell, John McIntire, Jeanette Nolan, Russell Simpson, Ed Begley, Jimmy Hunt, Orley Lindgren, Gordon Gebert, Gregory Moffett, Antonio Moreno, John Ridgely, Walter Coy, Joaquin Garay, Peter Leeds, Michael Steele y Paul Picerni. Chuck Conner ye un vagabundo que marcha bien feliz de no tener garra responsabilidat montau en o suyo caballo. Marcha de camín enta California pero ha decidiu visitar a un antigo amigo que vive en Nevada. Pero cuan ye de visita lo suyo amigo puya en o caballo de Chuck y cuan iste s'esbarrucha, caye y se mata en a cayida. Chuck se siente obligau a cudiar d'os suyos fillos chicoz, que son cuatre. Decide acceptar un treballo en un rancho pero se veye obligau a amagar a existencia d'os ninos a lo suyo chefe en estar iste bien poco amigo d'os ninos. Amás a situación se complica cuan os ninos acullen sin que Chuck en sepa cosa a Della, una mesacha que ha fuyiu de casa d'a suya tía por culpa d'o mariu d'ista. D'atra man, Jess Higgins, lo suyo chefe, se troba en luita con o propietario d'un atro rancho, Martínez, a qui acusa de robar-li lo vacumen, una acusación que iste li torna en considerar que ye Higgins qui li roba a él. Bien luego los ninos descubren qui ye lo verdadero ladrón. A cinta s'ambienta en bel momento indeterminau d'o sieglo XIX en o estau de Nevada y las suyas escenas se filmoron en o rancho Iverson en Los Angeles y en Newhall, en California.[2] Elenco[3]
Se veiga tamiénReferencias
Vinclos externos
|
