Miércols Santo

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

O Beso de Chudas (1860)

O Miércols Santo ye o cuatreno d'os días d'a Semana Santa, que prencipia o Domingo de Ramos, y mientres a que os cristianos remeran a Pasión, Muerte y Resurrección de Chesús de Nazaret.

Liturchia de Miércols Santo

O Evanchelio d'o Miércols Santo contina con a traición de Chudas Escariot en iste caso en o rilato de Sant Mateu:

Allora se'n fuo un d'os doce clamato Chudas Escariot ta os prencipes d'os sacerdoz y lis dició:

-«Qué me darez si tos entrego a Chesús?»
S'achustoron en trenta monedas de plata. Dende allora miraba una enchaquia ta entregar-lo.
O primer día d'os Acimos s'amanoron os disciplos ta Chesús y li dicioron:
-«A on quiers que aprestemos a cena de Pascua?»
Éll lis dició:
-«Iz-tos-ne ta la ciudat, ta casa de Fulán, y diciz-li: "O Mayestro dice: O mio tiempo ye amán. Quiero cilebrar a Pascua con os mios disciplos"».
Y os disciplos facioron como Chesús lis mandó y aprestoron a Pascua. Cuan cayó a tardada, se posó a la mesa con os doce disciplos, y mientres minchaban dició:
-«En verdat tos digo que un de vusatros m'entregará.»
Muit entristatos, escomencipió a dicir-li cadagún:
-«Talmén soi yo, Sinyor?»
Él respondió:
-«Qui con yo fica la man en o plato ta sucar, ixe m'entregará. O Fillo de l'hombre se'n va seguntes se'n ha escrito d'él; pero, hai de l'hombre lo traiciona! mas li valeba no ser naixito».
Prenió a parola Chudas, o que iba a entregar-lo, y dició:
-«¿Talmén soi yo, Rabín?»
Y él respondió:

-«Tú l'has dito».

Mateu 26, 14-25[1]

Celebracions en Aragón

Procesión de l'Alcuentro de Zaragoza

En Zaragoza cuatre cofadrías fan Via Crucis por diferents puestos d'a ciudat (Crucifixión, Ecce-Homo, Llegada y Humildad). A cofadría d'a Humillación fa la Procesión de María Santísma de l'Amargura por as carreras d'o centro de Zaragoza.

L'acto probablement mas important de Miércols Santo en Zaragoza ye a Procesión de l'Alcuentro que protagonizan as cofadrías d'o Calvario y a Dolorosa. Salindo a cofadría d'o Calvario de Santa Engracia y a chirmandat d'a Dolorosa dende Santa Isabel, plegan as dos de meyanueit a la Plaza d'o Pilar, puesto a on s'alcuentran os pasos de Jesús con la Cruz a Cuestas y a Virgen de los Dolores.

En Alcanyiz se fa a procesión d'a Soledat con as cofadrías d'o Nazareno y o Silencio, dimpués os alcanyizanos tanyen o tambor por a ciudat mientres tota la nueit.

En Graus se fa la procesión d'as Beatas u tamién conoixita como lo Farolé d'a que antis mas nomás feban parti as mullers.[2]

Referencias

1. Os cuatre Evachelios d'o nuestro Sinyor Chesucristo, basato en a traducción de mosén Pedro Recuenco Caraballo
2. Abril cultural en Graus

Semana Santa
Viernes de Dolors | Sabado de Pasión | Domingo de Ramos | Lunes Santo | Martes Santo | Miércols Santo | Chueves Santo | Viernes Santo | Sabado Santo | Domingo de Pascua

• Datos: Q386130
• Multimedia: Holy Wednesday / Q386130