|
Menstruación
  A menstruación, a regla[1][2] u o costumbre[3] ye un fenomeno fisiolochico d'as mullers que se presenta en as mullers sanas dende a pubertat dica a menopausia. Consiste en a expulsión d'os ovulos no fertilizatos, en forma de fluxo hematico, creyando perdugas de sangre, a la fin de cada ciclo menstrual. L'ovulo procede d'a cavidat uterina u utero y sale por a vachina. As perdugas de sangre son de chicota cantidat pero continas mientres os días que dura a menstruación, de tres a cinco días, encara que se considera normal d'un periodo de dos días dica siet.[4] Por un regular os primers días o fluxo ye mas abundant, mientres que os zaguers días ye muito menor. A cantidat total de sangre perdita en o ciclo menstrual varía en función d'a persona, pero a meyana ye d'uns sesenta mililitros. A menstruación ye regulata por as hormonas femeninas. A menstruación sigue un ciclo regular. A sobén o ciclo d'a menstruación dura alto u baixo 28 días, encara que pende de cada muller. O periodo que se considera normal va de 21 a 45 días. O ciclo menstrual d'una muller puet estar regular u no. Regular quiere decir que toz os ciclos constan d'o mesmo numero de días. Con a edat, os ciclos menstruals se van tornando mas regulars. A menarquía ye a primera vegata que una nina tien a regla, feito que se produce en a pubertat, entre os 10 y os 16 anyos. A edat en que se produce a primera menstruación ye muit variable, veyendo-se afectada mesmo por l'habitat cheografico. Por eixemplo as mullers de zonas de clima templato plegan antis a la maduración sexual. Entre os 45 y os 55 anyos (meyana 51.4 anys[5]), as mullers deixan de producir ovulos, y por tanto d'expulsar-ne os residuos asociatos, ye a menopausia. Referencias
Vinclos externos
|
Portal di Ensiklopedia Dunia
