Рашкы

Рашкы[1][2] (рус. Снежная крупа) — ак төстәге, диаметры 2 – 5 мм булган, карга охшаган кисәкчекләр. Үтә күренмәле булмаган, дөрес түгел түгәрәк яки конус формасында очраучы, болытлардан төшә торган каты атмосфера явым-төшеме. Һаваның температурасы 0 °C якын булганда җиргә төшә. Кайчакта рашкы үзе генә, кайвакытта кар белән бергә яварга яки ишеп кар яву алдыннан төшәргә мөмкин.

Рашкы яву

Кичтән яуган рашкы бөртекләре иртән

Төрләре

• Кар рашкысы — карга охшаган кисәкчекләр (төшләр)
• Боз рашкысы — тыгыз боз кисәкчекләре

Кар рашкысы

Кар рашкысы кар бөртекләре югары болыт катламыннан суынган вак тамчы бөртекләреннән торучы аскы болыт катламына эләккәндә барлыкка килә. Кар рашкысы кисәкләре кар бөртегеннән күзгә күренеп аерылып торган кристаллик нигезе булмавы белән аерыла.

Боз рашкысы

Боз рашкысы — өсте үтә күренмәле, кечкенә генә ак төше дә булган бөртекләр — рашкы болытның түбән катламындагы эрерәк булган һәм суынган тамчы бөртекләре белән бәрелешкәндә барлыкка килә.

Халык авыз иҗатында

Татар халык мәкале

Тургайга яңгыр тисә, баласын яшерә;
Рашкы тисә, үз башын яшерә.

Халык сынамышы

Каз авызын шакылдатса, рашкы явар.

Моны да карагыз

• Кар
• Кар бөртеге
• Боз яву

Галерея

• 
  Кар бөртеге рашкыга әверелә
• 
  Әзер була язган рашкы
• 
  Кар бөртеге формасындагы рашкы

Сылтама

• В. В. Бровкин. Атмосферные явления – классификация и описание. 2020 елның 1 июнь көнендә архивланган. meteocenter.net
• Ләйсән Сәлимова. Табигатьтә суның әйләнеше. Чык, бәс, яңгыр һәм кар ничек ясала? ilbyak-school.ucoz.ru

Искәрмәләр

1. Татар теленең орфография сүзлеге (авторлары Фуат Ганиев, Илһамия Сабитова). К.: «Раннур» нәшрияты. 2002, 273нче бит. ISBN 5-900049-59-0
2. Татарча-русча сүзлек. М.: Советская энциклопедия, 1966, 447нче бит.