|
پاݨی پاݨی (انگریزی:Water) اک بے رنگ ، بے بو تے بے ذائقہ مائع ہے جیہدے نال کسیاں، جھیلاں، سمندر تے مینہ بݨدے نیں۔ ایہہ جیوندیاں شیواں، کیمیائی کمپاؤنڈ دا اہم انگ ہے۔ پاݨی دے اک مالیکیول وچ اک آکسیجن تے دو ہائیڈروجن ایٹم کوویلنٹ جوڑ نال جڑے ہُندے نیں۔ پاݨی عام درجہ حرارت تے دباؤ اُتے پاݨی سار ہُندا ہے۔ ایہہ برف، گیس تے بھاف وچ وی مِلدا ہے۔ پاݨی نے زمین دے ٪71 حِصّے نوں گھیریا ہویا ہے۔ زمین تے پاݨی دا %96.5 حصہ سمندراں وچ اے، %1.7 خُشک زمینی پدھر تھلے ہے، %1.7 گلیشیئراں، انٹارکٹکا تے گرین لینڈ اتے ہے۔ تھوڑا جیہا حصہ پاݨی دے اکٹھاں وچ ہے تے %0.001 حِصہ ہوا وچ اے۔ زمین دے پاݨی دا %2.5 حصہ سجرا پاݨی اے تے ایہدا %98.8 برف دی شکل وچ ہے یا زمینی پاݨی وچ۔ %0.3 توں وی گھٹ پاݨی دریاواں، جھیلاں تے ہوا وچ اے تے ایس توں وی گَھٹ ایہ (%0.003) جیوندیاں شیواں یا مصنُوعی شیواں وچ ہے۔ انسان پاݨی توں بنا صرف 3 دن رہ سکدا ہے۔ زمین تے پاݨی اک چکر وچ ریندا ہے۔ ایہہ پاݨی توں پاف وانگوں اڈ کے اتے ول جاندا اے تے ٹھنڈا ہوکے بدل بݨدا اے تے مین٘ہ ورسدا اے تے ایہ فیر کچھ زمین وچ تے چوکّھا کسِّیاں تے دریاواں راہیں سمندر تک اپڑدا ہے۔ صاف پاݨی انساناں تے دوسری جیوناں لئی ضروری ہے پاویں ایہدے وچ کوئی کلوری یا طاقت والی شے نہیں ہُندی۔ پچھلے کئی دہاکیاں وج صاف پاݨی دنیا دیاں ساریاں تھانواں تے ہے پر ساریاں دی پونج وچ نہیں۔ ہجے وی اک ارب لوک صاف پاݨی توں تھڑے نیں تے ڈھائی ارب لوک ضروری صفائی توں۔ صاف پانی دے ورتݨ تے کِسے دیس دی آمدݨی دا آپس وچ گوڑھا تعلّق ہے۔ کیمیائی خواصپاݨی اک کیمیائی مادہ اے جیہدا کیمیائی فارمولا یا کیمیائی بنتر ہے۔ پاݨی دے اک مالیکیول وچ دو ایٹم ہائیڈروجن دے اک ایٹم آکسیجن دا کوویلنٹ کیمیائی ول نال بݨے ہوندے نیں۔ پاݨی نیچر وچ مادے دے تن ویساں ٹھوس، پاݨی سار تے گیس یا ہوا وچ ملدا اے تے ایہ زمین اُتے کئی شکلاں وچ دِکھدا اے: ہوا وچ، بدلاں وچ آسمان تے، سمندراں وچ لوݨے پاݨی ونگوں، قطبی سمندراں، برفیلے پہاڑاں وچ، پہاڑاں دے گلیشیئراں وچ، لوݨیاں تے سجرے پاݨی دیاں جھیلاں، دریاواں تے زمین دے اندر۔
باہرلے جوڑ |
Portal di Ensiklopedia Dunia
