kw Boos

Klass	askorras towladow, stoff
Konter a	tra nag usi boos
Rann a	edible
Synsys ynno/i	devnydh boos, dowr
	Restrennow kelmys war Gemmyn Wikimedia

Boos ew an peth ma teber tus rag bewa. Ema othem dhe bub organedh nerth rag an process a vewa hag a dheu dhort boos. Dell ew usys boos a dheu dhort enevales ha plansow. Boos ew debrys gen taklow bew rag kawas nerth ha sosten. Boos a gomprehend an sosten dell usi othem dhe bobel hag enevales y gawas rag bos yagh. Da ew gen pobel debri boos, herwydh usadow. Boos a gomprehend protin, blonek, karbohydratow, vitamynnow, dowr ha monyow. Gelwys ew linyow evys dell ew usys rag nerth ha sosten en venowgh vel diwosow. Ema nown dhe nebonan a spena termyn hir heb boos.

Gwres ew boos rag pobel der abmeth po lowartha. Ema hebma ow komprehendya pednfentydnyow a enevales ha losow kegin. Ema nebes tus ow skonya boos dhort enevales, pekara kig, oyow hag askorransow gen leth et anjei. Losowegorieth ew debri boos heb kig ha losoweger ye den a wra hebma. Veganieth ew skonya debri askorransow eneval veth oll.

Ehennow a voos debrys gen tus

Frooth
Losow kegin
Greun
Has
Kodhlesow (Fav, pys, pys melyn hag erel)
Erbys
Spisyow
Kig
Boos-mor
Oyow
Askorransow leth

An diwysyans boos a ell chanjya boos askorrys gen tiogow po lowarthoryon. Boos dyghtys a gomprehend devnydhyow naturel ha keworansow boos pekara kyfeythednow (preservatives), gorthoksidednow, emolsyednow (emulsifiers) ha moggheroryon sawer (flavour enhancers). Rag ensampel, bara ew boos dyghtys.

Dyghtya boos ew gwres tre e’n gegin gen kog. Terweythyow an kog a wra devnydh a lever kegina. Ensamplow a daklow kegina ew pottow, fornow ha padellow.

Pareusi boos a ell bos gwres ewedh en bostiow.

Taklow usys rag debri boos a gomprehend platyow, kellyll, fergh, gwelenigow debri, loyow, lestri ha bollys.

Na wra lies den tevi aga boos aga honan. Res ew dhe anjei prena boos tevys gen tiek en shoppa po marghas.

An dewis a voos ew debrys en pow po tiredh ew gelwys keginieth. Keginiethow tramor meurgerys en Kernow ew boos eyndek, chinek, italek hag amerikanek en-mysk erel.

Askorrans boos

E’n dalleth pobel a wre kawas boos avel helghoryon-kuntelloryon. An domhwelans amethel a gawsas chanj meur. Tiogow a dhallathas tevi trevasow, ha’ga gwellhe gen megyans dewisus. Drefen hebma, moy ha moy a bobel a alja kawas sosten, ha gwellhe blasow ewedh.

Fowt a voos a veu kudyn meur der istori. Nag eus dhe lies den an mona rag prena boos. Hager awel, po terosedhow naturel pekara gwensow a-dro a ell distrui trevasow en tiredhow efan. Pan nag eus boos luck rag termyn hir, pobel a dheffo klav po merwel dre nown. Mar hwer hebma dhe lies den, leverys ew bos divotter ena.

Mar na dheber tus an bosow ewn, Anjei a dheffo klav:

mar na dheber pobel protin lowr, anjei a ell kawas an dises ‘kwashiorkor’.
mar na dheber tus vitamyn B1 lowr (thiamin), anjei a ell kawas an dises ‘beriberi’.
mar na dheber tus vitamyn C lowr (trenken askorbik), anjei a ell kawas an dises henwys kleves mor (scurvy).
mar na dheber fleghes vitamyn D lowr, anjei a ell kawas an dises henwys legh (po rickets).

Kaletterow yeghes a sew debri re a vosow arbednek. Berri a gaws kleves melys, dises kalon ha strokasow.

Boos en kryjyansow

Ema dhe lies gonisogeth po kryjyans tabous boos. Hebm a styr bos rewlys a-dro dhe’n bosow ma thuji pobel sevel ort aga dybri po fatel ew res pareusi boos. Ensamplow a rewlys boos kryjyk ew Kashrut en Yedhoweth ha Halal en Islam, hag a lever na godh dhe hwei debri kig mogh. Re eglosow Kristyon ew losowek, rag ensampel an Eglos Asvensyth a’n Seythves Dydh.