|
World War Z (cinta)
World War Z ye una cinta de terror y acción de ciencia-ficción de zombis dirichida en l'anyo 2013 por Marc Forster seguntes un guión adaptau por Matthew Michael Carnahan, Drew Goddard y Damon Lindelof en desembolicando una historia d'o mesmo Matthew Michael Carnahan y de J. Michael Straczynski basada en a novela World War Z publicada por Max Brooks (fillo d'os actors Mel Brooks y Anne Bancroft) en l'anyo 2006. A dirección de fotografía de World War Z ye de Ben Seresin y la suya Banda Sonora Orichinal de Marco Beltrami, estando producida por Brad Pitt, Dede Gardner, Jeremy Kleiner y Ian Bryce ta las productoras Skydance Productions, Hemisphere Media Capital, GK Films, Plan B Entertainment y 2DUX². En l'elenco d'a cinta podemos trobar, entre d'atros, a los actors Brad Pitt, Mireille Enos, James Badge Dale, Matthew Fox, Daniella Kertesz y Fana Mokoena. En a cinta l'actor Brad Pitt interpreta a Gerry Lane, un antigo investigador de Nacions Unidas que viacha por o mundo ta buscar una solución ta un repentino apocalipsi zombi. La cinta s'engueró en l'Empire Cinema de Londres (Reino Uniu) o 2 de chunio de 2013 (bels días antes d'o suyo enguero cheneral en os Estaus Unius, mesmo en 2D que en RealD 3D), y s'heba rodau en localizacions en Malta, Glasgow (Escocia, Reino Uniu), Cornualla y Londres (Reino Uniu), Budapest (Hongría) y Corea d'o Sud; estando ambientada en a provincia de Gyeonggi (Corea d'o Sud), Cherusalem, Nueva York, Nueva Jersey, Nueva Escocia, Philadelphia y Galas. A finals de chunio de 2013 esleyoron World War Z ta inaugurar a 35ena edición d'o Festival Internacional de Cine de Moscú. Tenió un amplo exito de publico, en fer un recaudo de 540 millons de dólars, muit superior a lo suyo presupuesto de 190 millons, estando la cinta de cine de zombis con mas recaudo d'a historia, pero recibió criticas mixtas d'a critica profesional, en elochiando l'actuación de Brad Pitt y la cinta en cheneral mas que mas en fer renaixer o cine de zombis, pero en criticando tamién lo suyo guión, en parte en considerar que no guardaba fidelidat a lo suyo orichinal. Bien luego d'o suyo enguero, s'anunció una continación d'a cinta pero en febrero de 2019 se canceloron os plans ta la filmación d'ista secuela, suposadament por problemas de tipo presupuestario. ArgumentoGerry Lane ye un antigo investigador de Nacions Unidas que vive con su muller, Karin, y sus dos fillas, Rachel y Connie, en a ciudat de Philadelphia (Pennsilvania). Bel día, en puyar la familia en o suyo auto, se troban en bel meyo d'una invasión d'a ciudat por zombis. Gerry observa que cuan un zombi muerde a una persona ista tarda nomás que 12 segundos en transformar-se tamién en un zombi. Finalment, Gerry consigue fuyir d'o caos de Philadelphia y plega en Newark, en l'amanau estau de Nueva Jersey, a on aspera estar reculliu por os servicios de Nacions Unidas. Mientres a espera, se refuchia en un piso a on vive una parella de brasileros con o suyo fillo, Tommy. O subsecretario de Nacions Unidas, Thierry Umutoni, ninvía un helicoptero ta salvar-los y con els marcha tamién lo nino Tommy (Tomas), en haber quedau sus pais infectaus en no haber queriu marchar d'o suyo refuchio con Gerry y su familia. L'helicoptero transporta a lo grupo enta un barco de guerra d'a U.S. Navy ancorau en l'oceano Atlantico y a on cientificos y militars analizan a situación y preban de trobar-ne solución. Un d'os cientificos, Andrew Fassbach, un virologo, afirma que lo causant d'a transformación enta zombis d'os afectaus ye un virus y que lo posible desembolique d'una vacuna contra ixe virus depende de poder-ne trobar lo suyo orichen. Cuan li proposan a Gerry de marchar con o virologo ta trobar ixe orichen, en primeras se niega pero en estar menazau de que a él y a la suya familia los expulsen d'o barco que lis guarencia bela aseguranza, accede a acompanyar a lo virologo. Finalment, Gerry Lane, lo virologo Andrew Fassbach y un grupo de Navy SEAL d'a U.S. Navy puyan en un avión que marcha enta Camp Humphreys, una base militar de l'exercito estausunidense en Corea d'o Sud, porque ye en ixe puesto a on se i fació la primera mención d'ataques zombis. Nomás aterrizar o grupo ye atacau por zombis y en sentir panico y prebar de fuyir, o virologo Andrew Fassbach caye accidentalment con a suya arma y se pistoletia a si mesmo, morindo. Los soldaus d'a base consiguen rescatar a lo grupo y dimpués informan a Gerry d'os escaicimientos, en decindo-le que qui introdució lo virus en as instalacions militars estió lo medico d'a base en atender a un soldau feriu que heba estau atacau fuera d'o campamento. Tamién li dicen que a un d'os soldaus mai no l'atacan os zombis, que ye muit potroso, y Gerry observa que tiene una ferida prou periglosa, que ye anterior a los ataques zombis. En a base tamién se troba engarcholau por traiduría un miembro d'a CIA, que li diz a Gerry que fácil que o Mossad, os servicios secretos d'Israel, conoixese con anterioridat o brote d'o virus y podioron establir una zona segura. Cuan Gerry marcha enta l'avión ta marchar enta Israel, Karin truca por o telefón móbil a Gerry y, en sentir o rudio, os zombis los atacan y nomás que Gerry y lo piloto de l'avión pueden puyar-ie, volando enta Israel. En plegar en Cherusalem, Gerry charra con Jurgen Warmbrunn, un miembro d'alto rango d'o Mossad, qui li explica que heban interceptau mensaches de chenerals de l'exercito indio que deciban que yeran luitando contra rakshasa y que els interpretoron que podeba tractar-se de zombis y que por ixo decidioron protecher-se en construyindo un gran muro arredol d'a ciudat y a on son acceptando a cuantismos refuchiaus en considerar que cada persona que pueden salvar ye amás un zombi menos contra lo que luitar dimpués. Mientres que Warmbrunn amuestra a Gerry lo muro, un grupo de refuchiaus principia a cantar, fendo muito rudio, y Gerry puet veyer cómo lo rudio atraye a los zombis, que s'abotinan contra lo muro dica que lo suyo numero ye suficient como ta puyar-se uns dencima d'atros y poder saltar o muro. Os zombis anegan a ciudat a escape y Warmbrunn ordena a un grupo de militars d'as Fuerzas de Defensa d'Israel que l'escolten dica lo suyo avión. Mientres a suya fuyida enta l'avión, Gerry veye cómo los zombis no atacan ni a un anciano ni a un nino aparentment malauto de cáncer. Mientres a fuyida, os miembros d'a suya escolta mueren poquet a poquet en os ataques zombis dica que finalment a Segen, una d'os soldaus, li dan un mueso en a suya man. Gerry reacciona escopetiau y li estralla la man d'un solo golpe, impedendo que lo virus s'expanda por o suyo cuerpo y que se transforme en zombi. Finalment, Gerry y Segen logran puyar en l'avión, que fa volito. En l'avión, Gerry li fa las curas a Segen pero tamién reflexiona sobre todo lo que ha podiu veyer istos zaguers días y truca a Thierry Umutoni con l'obchectivo de conoixer bel centro de Nacions Unidas a on se i conserven virus periglosos, y finalment l'avión marcha enta Caerdydd, en Galas, a on se i troba un centro d'investigación d'a Organización Mundial d'a Salut. Sindembargo, encara que parixe que dentro de l'avión son seguros, un zombi ha podiu dentrar-ie como polizón y ataca a una miembro d'a tripulación de l'avión, convertindo-se en zombis a escape pasachers y tripulación. Gerry no troba so que una solución: fer esclatar una granada de man en l'avión ta que la explosión expulse a los zombis de l'avión, pero ixo comporta tamién la cayida de l'avión. Gerry y Segen consiguen sobrevivir y plegar en o centro medico d'a OMS, pero Gerry ye feriu y no dispierta so que tres días dimpués. En dispertar, Gerry explica a los cientificos d'a OMS d'o centro la suya teoría: los zombis ignoran como posibles blancos d'os suyos ataque a personas con malautías terminals u feridas greus, en considerar que no son vehiclos adecuaus ta guaranciar a supervivencia y expansión d'o virus. La suya sucherencia ye asinas la d'infectar-se con un patocheno mortal que lis permita de tener un camuflache que de bela manera los pueda fer "invisibles" ta los zombis. Tanimientres, os cientificos li dicen a Gerry que lo problema ye que los suyos patochenos se troban en un aria d'as suyas instalacions que ye plena de zombis. Gerry consigue convencer-los y dentra en ixe sector, acompanyau de Segen y d'o medico chefe, dica que plegan en l'aria restrinchida d'o laboratorio a on se i conservan os patochenos. Pero antes que Gerry pueda marchar con as muestras se troba bloquiau por un zombi que ye en una d'as cambras que ha de trescruzar ta tornar, asinas que se veye obligau a prebar la suya propia teoría en inchectando-se un patocheno. Lo fa y, en ubrir a puerta d'o laboratorio, comprueba que la suya teoría ye correcta porque lo zombi lo inspecciona pero no l'ataca y lo dixa continar tranquilament lo suyo camín. Gerry ha podiu trobar una vía ta luitar contra lo virus y plega en Nueva Escocia con Segen ta reunir-se con a suya familia. Con a suya investigación se logra fabricar una vacuna que actúa como un camuflache contra los zombis y permite luitar contra els y mantener zonas seguras, pero la luita encara contina. Elenco[2]
ProducciónDesemboliqueDimpués d'una guerra d'ofertas con a productora Appian Way de Leonardo DiCaprio, Plan B Entertainment de Brad Pitt s'aseguró d'os dreitos de pantalla d'a novela World War Z de Max Brooks en 2007.[3] A primera versión d'o guión la escribió lo creyador d'a serie de televisión Babylon 5 y d'o cómic Rising Stars, J. Michael Straczynski, qui identificó o desafío d'adaptar o treballo como "creyar un personache principal sobre la base d'un libro que se leye como un informe d'a ONU sobre las guerras d'os zombis".[4] Marc Forster firmó ta dirichir-la y describió la cinta como una reminiscencia d'os thrillers de conspiración d'os anyos 1970, como All the President's Men.[5] Straczynski identificó la cinta de cine d'espionache de 2002 The Bourne Identity como una comparanza apropiada y sinyaló que la cinta tiendría una gran presencia internacional que mantiendría l'enfasi politico.[6] Cuan se li preguntó sobre la suya participación en a cinta, l'autor Max Brooks dició que teneba "cero control", pero que yera a favor d'un papel ta Brad Pitt en a cinta,[7] y expresó la suya aprobación de Straczynski como guionista.[8][9] Brooks dició: "No puedo decir-lo, pero Straczynski trobó una manera de fer chunta de todo. O zaguer esborrallo que leyiei yera increíble".[10] Un d'os primers guions se filtró en Internet en marzo de 2008, y como consecuencia d'ixo se publicó una resenya en Ain't It Cool News que lo clamaba "[no] nomás que una buena adaptación d'un libro difícil [so que] una obra que define lo chenero y que podría rematar en veyendo-nos toz discutindo sobre si una cinta de zombis califica u no como material de "Millor Cinta".[11] O guión yera prou respectau como ta trobar puesto en a The Black List de 2007 d'os guions "mas quiestos" que encara no s'han produciu.[12] En ista resenya en Ain't It Cool News tamién indicaban que la cinta teneba pareixiu estilistico con Children of Men, en seguindo a Gerry Lane mientres o suyo viache por o mundo d'a posguerra y as suyas entrevistas a sobrevivients de la guerra d'os zombis que "principian a preguntar-se si la supervivencia ye bella traza de victoria".[11] En aviento de 2008, Straczynski dició que asperaba que la producción d'a cinta escomenzase a principios de l'anyo 2009,[6] pero en marzo d'ixa mesma anyada Forster dició que lo guión encara yera desembolicando-se y que no yera seguro de si World War Z estaría la suya proxima cinta.[13] Bien luego, en ixe mesmo mes de marzo, amanixioron rumors de que s'heban establiu oficinas de producción y que la cinta se trobaba ya en as suyas primeras etapas de preproducción.[14] Dimpués, en o mes de chunio, Forster li dició a un entrevistador que la cinta se retrasaría, en afirmando que lo suyo guión encara amenistaba de muito desembolique y que "encara yera bien luent de realizar-se".[15] Brooks reveló que Matthew Michael Carnahan yera reescribindo lo guión en chulio de 2009. Dició que creyeba que ixo "amostraba [la confianza d'o productor] en iste prochecto" por a cantidat de diners que yera invertiedo-ie.[16] Paramount Pictures y UTV Motion Pictures anuncioron en a Convención Internacional de Cómics de San Diego de 2010 que Marc Forster estaría lo director y se confirmó que Brad Pitt interpretaría lo papel principal.[17] En marzo de 2011, s'informó en Vulture que la Paramount yera buscando un cofinanciador, y fácil que cancelase l'adaptación si no en trobase.[18] L'articlo tamién deciba que "se ye fendo a chemecons un poder ta convencer a David Ellison, frecuent co-financiador a'a Paramount ". Una semana dimpués, s'informó que "se son fendo conversacions intensas y esfugadas con Skydance Media de David Ellison y mesmo con atros dos financiadors".[19] PreproducciónA preproducción escomencipió en abril de 2011, con Robert Richardson anunciau como director de fotografía y Nigel Phelps como disenyador de producción.[20] En ixe mesmo mes s'informó que los puestos de filmación incluyirían Pinewood Studios y la ciudat de Londres, toz dos en Anglaterra.[21] Tamién en abril s'esleyó a Mireille Enos ta representar a la muller de Gerry Lane y mai d'os suyos dos fillos.[22] En chunio, James Badge Dale inició negociacions ta chunyir-se a la cinta en interpretando a un soldau estadounidense que preba d'alertar a las autoridaz de que la menaza zombi ye real.[23] Matthew Fox y Ed Harris dentroron en conversas, y Julia Levy-Boeken temién yera preparada ta chuntar-se a la cinta.[24] Tamién s'informó que lo rodache escomencipiaría en Malta en o mes siguient y abracaría Valetta y As Tres Ciudaz.[25] Bels días dimpués, s'informó que tamién se filmaría en Glasgow, en Escocia, en o mes d'agosto,[26] con ixa ciudat representando a la ciudat estausunidense de Philadelphia, "con fronteras de botigas falsas en construcción y automóbils estausunidenses en as carreteras".[27] Seguntes os informes, esleyoron Glasgow dimpués de "muitos meses en buscando la ubicación perfecta en o centro d'a ciudat para desempenyar un papel important en a cinta".[26] Desdenyoron Philadelphia por "incertezas sobre os creditos fiscals estatals ta cineastas".[28] Tanimientres, incialment s'heba planificau a filmación en a localidat de Royal Tunbridge Wells, en Anglaterra, antes de decidir-se por Glasgow.[29] Bien luego, encara en o mes de chunio, a empresa d'efectos visuals Cinesite anunció que treballaría en "una cantidat significativa de tomas".[30] A finals de mes, s'informó que, beque d'os informes anteriors, ni Matthew Fox ni Ed Harris no protagonizarían a cinta; Fox tenió un conflicto de programación derivau d'o suyo compromiso previo ta protagonizar Alex Cross con Tyler Perry ta Summit Entertainment,[31] encara que dimpués se podió veyer a Fox en rodando escenas ta World War Z en Aberfala (Cornualla).[32] RodacheCon un presupuesto informau de mas de 125 millons de dólars,[18] a fase de rodache escomencipió en chulio de 2011 en Malta y poquez días dimpués se publicoron as primeras imáchens d'o rodache.[33] Heban programau que lo rodache se trasladase enta Glasgow en agosto, y la productora buscaba recrutar bels 2.000 extras locals ta las diferents escenas d'o rodache.[34] A lo menos 3.000 personas se presentoron en un cásting en Glasgow o día 9 de chulio, con l'alufra de tener a oportunidat d'amanixer en una escena ambientada en un districto financiero de Philadelphia.[35] Igualment, se filmoron atras escenas en Aberfala (Cornualla).[36] Tamién en chulio, s'esleyó a l'actor de Game of Thrones Elyes Gabelfue ta interpretar a un personache clamau Fassbach.[37] Encara que habió oposición d'os suyos residents, bellas escenas se rodoron en Heygate Estate, una urbanización situada a lo sud de Londres.[38] En agosto, l'actor Bryan Cranston tenió negociacions ta participar en a cinta con un papel "chicot encara que clamativo", pero finalment tenió que albandonar por problemas d'achenda. Tamién en agosto, se decidió filmar en una carretera en o perimetro d'una refinería en Grangemouth, en Escocia, un puesto esleyiu por a lonchitut d'a carretera, que estió crucial ta ixa escena.[39] Bels días dimpués, Paramount anunció que la cinta s'engueraría o 21 d'aviento de 2012.[40] Ixe mesmo mes escomencipió lo rodache en a ciudat de Glasgow. O cherent de locacions d'a cinta afirmó que s'heba esleyiu Glasgow por a suya arquitectura, carreras amplas y disposición en cuadricla d'a ciudat.[41] Tamién se filmoron escenas a bordo d'o RFA Argus, un barco auxiliar d'a Royal Fleet Auxiliary, antes d'o rodache en Glasgow. O barco se convertió en a cinta en o USS Madison, asinas que calió colocar-ie un nuevo numero de barco en o suyo costau y adhibir-ne bella cosa d'"americanismo" a la suya superestructura. Steven McMenemy, o piloto de l'Argus, afirmó que "o barco zarpó y se nos unioron cuatro chicoz catamarans que se feban servir como marcadors ta las camaras, ta que posteriorment s'adhibisen dichitalment os barcos de guerra en o suyo puesto".[42] En octubre s'esleyó a l'actor David Morse ta interpretar o papel d'un "presonero que se troba en una garchola albandonada".[43] Inicialment, os realizadors teneban a intención de filmar una escena de batalla culminant ambientada en Rusia, y l'equipo se tresladó enta Budapest ta filmar-la-ie,[44] y lo rodache en Budapest escomencipió en a nueit d'o 10 de octubre.[45] Pero de maitins o Centro Antiterrorista d'Hongría (Terrorelhárítási Központ) fació un rechistro en l'almagazén a on se guardaban as armas que s'heban de fer servir ta la filmación.[45] Os 85 fusils d'asalto, fusils de francotirador y pistolas s'heban tresladau en Budapest mientres a nueit en un avión privau, pero os productors d'a cinta no heban feito los tramites administrativos adecuaus con as autoridaz hongaras y amás, encara que la documentación d'importación indicaba que las armas heban estau inhabilitadas, en o rechistro se trobó que todas ellas yeran completament funcionals.[45][46] O 10 de febrero de 2012 revocoron a denuncia cuan os investigadors no podioron identificar exactament cual "organización u persona" teneba "dreitos de propiedat"; por a cual cosa no pudieron "estableixer cual parte yera penalment responsable".[47] A parte principal d'o rodache remató lo 4 de noviembre de 2011. PostproducciónEn chunio de 2012 contractoron a lo guionista Damon Lindelof ta que reescribise lo tercer acto d'a cinta, y las nuevas filmacions se programoron ta fer-se en setiembre u octubre.[48] Lo presentoron como nomás que belún que nomás treballaría qur en ixa parte y no pararía cuenta d'o resto d'a historia d'o guión y dició: "(Brad Pitt) me charró de que yera emocionau cuan heba leyiu lo libro, y lo que ta él yera emocionant yera l'aspecto cheopolitico da trama. Pero cuan escomencipiamos a treballar en o guión, muitas d'ixas cosas tenioron que desaparixer ta que la historia se chunise".[49] Lindelof explicó que habió ineficiencias en o guión en relación con o rodache que escomencipió antes de que rematase la escritura d'o guión, y que por ixo lo final yera "abrupto y incoherent", y que a la cinta li faltaba una gran parte d'o metrache. Presentó dos opcions a los executivos, que finalmente optoron por filmar de 30 a 40 minutos de metrache adicional ta cambiar o final. Sindembargo, Lindelof, qui tamién heba reelaborau Prometheus y heba coescrito Star Trek Into Darkness, no tenió tiempo d'escribir o guión d'o nuevo final y por ixo en chulio la Paramount contractó a lo suyo socio de Lost, Drew Goddard, ta rematar o treballo.[50] Goddard dició posteriorment a Creative Screenwriting:[51] Ta yo, la gran lección de World War Z estió que Paramount, Plan B y Brad Pitt simplament dicioron: "Pillemos o tiempo ta fer d'ista cinta la mejor versión d'a cinta antes de ficar-la en a pantalla ta l'audiencia" (sic). Ixo no gosa pasar. Muitas vegadas simplament avientan a cinta y dicen: "Ganaremos todos os nuestros diners o cabo de semana d'enguero y dimpués a película desaparixerá". Marchei d'ixo pensando: "Porqué no femos ixo en mas cintas?"
Ixas nuevas tomas, amás d'atros excesos, facioron que lo presupuesto d'a cinta puyase dica alto u baixo 190 millons de dólars, i ixó sorprendió a lo president de Paramount, Marc Evans.[52][53][54] Muitas d'as escenas rodadas en Budapest, incluyindo-ie una batalla a gran escala amostrando combaz contra los zombis en a Plaza Roya de Moscú,[55] se suprimioron en o montache final ta diluyir os matices politicos d'a cinta y enfocar-se mas enta una producción mas amigable en cheneral.[56] La escena culminant d'a batalla en Rusia, ta la que se rodoron 12 minutos de metrache, suposadament teneba a lo personache de Pitt luitando contra zombis mas como "un heroi guerrero" que como "lo comprensivo hombre de familia" d'as escenas anteriors. O director d'a segunda unidat, Simon Crane, dició: "Ya no se basaba en os personaches... [os cineastas] realment amenistaban pensar qué quereban fer con ixa escena".[44] Tamién se filmoron escenas adicionals en l'edificio de Pfizer en Discovery Park en Sandwich, en Kent, ta escenas en as que Gerry preba de trobar una cura ta la pandemia de zombis.[57] En marzo de 2013 s'nformó que Paramount heba cambiau una escena d'a cinta en a que os personaches especulaban que lo brot de zombis s'heba orichinau en a China continental, con l'asperanza d'aportellar un alcuerdo de distribución en ixe país.[58] Un executivo familiarizau con os proximos engueros en China li dició a TheWrap en chunio que los censors chineses heban desitau una parte d'a película. Un executivo de Paramount afirmó que "no conoixeba garra desite" y explicó: "Hemos presentau una versión y encara no hemos recibiu una respuesta".[59] Banda sonoraTa más detalles, veyer l'articlo World War Z (banda sonora)veyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].
En aviento de 2011 se fació publico que Marco Beltrami heba sinyau un contracto ta componer a banda sonora orichinal de World War Z.[60] En mayo de 2013 a banda de musica rock britanica Muse publicó un video en a suya canal en YouTube a on escunzaban a suya partecipación en a banda sonora d'a cinta, y efectivament s'emplegóa suya canción The 2nd Law: Insulated System publicada en o suyo disco The 2nd Law (2012) y tamién una versión instrumental d'a suya canción Follow Me producida por a banda Nero.[61][62] O 18 de chunio de 2013 Warner Bros. Records engueró lo disco con a banda sonora de World War Z a on se i incluyiba a partitura orichinal composada por Beltrami.[63] EngueroInicialment s'heba previsto que l'enguero de World War Z s'escaiciese o 21 d'aviento de 2012, pero en marzo de 2012 se dió prolargas dica lo 21 de chunio de 2013 en preferindo la Paramount enguerar en aviento de 2012 la cinta Jack Reacher (Christopher McQuarrie).[64] Finalment, l'enguero mundial de World War Z s'escaició en l'Empire Cinema de Leicester Square en Londres o 2 de chunio de 2013.[1] O 6 de chunio de 2013, Brad Pitt asistió en un mesmo día a las procheccions d'a cinta en Atlanta, Philadelphia, Chicago y Austin.[65] Tamién s'engueró la cinta en o Grosvenor Cinema en Glasgow (Escocia) o 19 de chunio, y lo 20 de chunio World War Z inauguró la 35ena edición d'o Festival Internacional de Cine de Moscú.[66] En total, Paramount gastó 160 millons de dólars en a promoción d'a cinta arredol d'o mundo.[67] RecepciónSe veiga tamiénReferencias
Vinclos externos
|
.svg){kind=small}
Portal di Ensiklopedia Dunia
