Protobulgaros

Victoriosos soldatos protobulgaros asasinan a os suyos oponents romanos d'orient (bizantins), d'o Menolochio de Basilio II, sieglo X.

Os protobulgaros estioron un pueblo nomada que habitaba en as estepas d'Europa Oriental. Una parte d'ellos trescruzó lo Danubio invadindo l'Imperio Romano d'Orient y ocupando Moesia, a on se fusionó con a población sedentaria eslava y traco-romana contribuyindo a la formación d'o pueblo eslau bulgaro. Atra parte d'ellos formoron un reino en a cuenca d'a Volga que duró dica la invasión mongola d'o sieglo XIII. Se suposa que yeran un pueblo turquico relacionau con os hunnos y os chuvaixes y que tamién han contribuyiu a la formación d'os pueblos tartaros d'a Volga.

L'arqueolochía documenta en o sieglo VI a presencia d'una cultura atribuyible a los protobulgaros en as estepas ponticas, vecins orientals d'os eslaus. Corresponden a los protobulgaros as tumbas prencipescas de Perescepino, Glodosy y Voznesenka, con vaixiellos bizantins, armas y choyas.

Pareixe que i heba a lo menos cuatro brancas u cuatro zonas con población protobulgara:

• En a val d'o Kubán.
• Os Utrigurs, que dimpués quedaría establida en o baixo Kama.
• Os Cutrigurs, a lo norte d'o Baixo Danubio.
• Una branca que yera por Europa centro-oriental y que entró en Italia con os longobardos.

Enantes d'a deseparación definitiva d'as dos brancas supervivients d'o pueblo protobulgaro nomada heban plegau en un apocheu baixo o khan Kubrat. A invasión d'os Gazaros los deseparó.[1]

O estau protobulgaro de Mesia

Enta la decada de 670, una branca d'o pueblo protobulgaro baixo lo mando d'o khan Asparukh crució lo Danubio y ocupól o norte d'a provincia romana de Mesia. Os bizantins no podioron evitar-lo y rematoron acceptando a perda d'este territorio. Os protobulgaros facioron liga con siet tribus eslavas que yeran en a ribera d'o Danubio, y se creyó un estau que se convertió en o Primer Imperio Bulgaro. O prencipe bulgaro Tervel establió buenas relacions con Chustinián II y firmó un tractau comercial con Costantinoble.[2]

O khan Crumo (803-814) pautó con Carlos Magno y atacoron chuntos a los avaros, desfendo lo estau avaro, pa dimpués repartir-sen Panonia entre Bulgaria y l'Imperio Carolinchio con o río Tizsa como muga.[2]

A introducción d'o cristianismo como relichión oficial d'o Primer Imperio Bulgaro con una liturchia en eslau fació que os protobulgaros, de luenga turquica, s'eslavizasen y que con o tiempo toz os pueblos eslaus d'o estau bulgaro se convertisen en un pueblo solo conoixito tamién como "bulgaros".

Referencias

1. Hermann Kinder, Werner Hilgemann y Manfred Hergt: Atlas Histórico Mundial. De los orígenes a nuestros días Ediciones Akal, 2007. p 117.
2. Gabriela Makowiecka y Estanislao Macowiecki: La Cultura Eslava Editora Nacional.

Bibliografía

• José-Ramón Julià et alii: Atlas de historia universal. Tomo I de los orígenes a las crisis del siglo XVII. Editorial Planeta.
• Hermann Kinder y Werner Hilgemann: Atlas histórico mundial. Ediciones Itsmo.

• Datos: Q110117
• Multimedia: Bulgars / Q110117