Der Untergang (títol orichinal en alemán, en aragonés L'esvoldregón, enguerada en Aragón con o suyo títol traduciu enta lo castellano como El hundimiento) ye una cinta de cine de drama belico historico biografico de l'anyo 2004 coproducida por o cine alemán, o cine austriaco y lo cine italiano, dirichida por Oliver Hirschbiegel seguntes un guión orichinal de Bernd Eichinger (basau en l'ensayo Der Untergang: Hitler und das Ende des Dritten Reiches de l'historiador Joachim Fest y en Bis zur letzten Stunde, as memorias de Traudl Junge editadas por Melissa Müller), con una banda sonora orichinal de Stephan Zacharias, una dirección de fotografía de Rainer Klausmann y una producción cinematografica de Bernd Eichinger ta las productoras Constantin Film, Norddeutscher Rundfunk, Westdeutscher Rundfunk, ARD Degeto Film, Österreichischer Rundfunk, EOS Entertainment y Rai Cinema.
A cinta explica os zaguers días d'a vida d'Adolf Hitler y lo nuclio dirichent d'o Tercer Reich mientres a batalla de Berlín en a Segunda Guerra Mundial, emparetaus en un bunker en a ciudat de Berlín baixo l'edificio d'a cancellería d'o Reich y soniando con ofensivas imachinarias ta frenar l'abance de l'Exercito Royo dica lo setio d'a ciudat y l'esvoldregada d'o nazismo. Ambientada en 1942 en a Wolfsschanze u Tutón d'o Lobo, o cuartel cheneral de Hitler ta lo Frent Oriental, situau en l'antiga Prusia Oriental, amán de l'actual Kętrzyn hoy en o voivodato de Varmia y Masuria en Polonia y en 1945 en o bunker d'a Cancellería en Nerlín, as escenas d'a cinta se filmoron en Sant Petersburgo en Rusia, y en Múnich (Bavera) y Berlín en Alemanya[2]
Ye una cinta que ha recibiu muitos premios y nominacions, en destacando una nominación a los Premio Oscar a la Millor Cinta en luenga no anglesa en a suya 77ena edición.
Se veiga tamién
Referencias
Vinclos externos
