|
William Westmoreland
William Childs Westmoreland, naixito o 26 de marzo de 1914 en Saxon (condau de Spartanburg en Carolina d'o Sud, Estaus Unius) y muerto o 18 de chulio de 2005 en Charleston (Carolina d'o Sud), estió un militar estausunidense que plegó dica o ran de cheneral de l'Exercito estausunidense. A suya fama provién d'estar o comandant en cabo d'as operacions militars estausunidenses mientres a Guerra de Vietnam dende 1964 dica 1968. Estudios y Segunda Guerra MundialWilliam Westmoreland estudeó en l'Academia militar de West Point, partecipando en a Segunda Guerra Mundial, a o estió en as campanyas d'a Operación Torch, d'o desembarco en Sicilia, de Francia (Batalla d'as Ardenas en Bastogne dende aviento de 1944 dica chinero de 1945) y d'Alemanya, dica rematar a suya intervención en a guerra plegando a o ran de coronel. Guerra de Vietnam En 1964 o president Lyndon Johnson ninvió a Westmoreland a Vietnam, cuan os Estaus Unius i teneban 16.000 «consellers militars» aduyando a Vientnam d'o Sud, y Westmoreland fue recibito como o comandant que podeba redotar a Vietnam d'o Norte y imponer a democracia en a comarca. Dimpués d'ixo, Westmoreland mandaba una tropa formata por mas de meyo millón de soldatos. Sindembargo, mandatos por Westmoreland, as tropas d'os Estaus Unius «vencioron en cada batalla dica perder a guerra». O momento que marcó a involución d'a guerra estió a ofensiva d'o Têt en 1968, cuan as tropas comunistas atacoron ciudaz y lugars estendillatos por tot Vietnam d'o Sud. As tropas de l'Exercito estausunidense y de l'Exercito sudvietnamita repelioron os ataques, y as tropas de l'Exercito norvietnamita y d'o Viet Cong sufrioron importants perdugas. Sindembargo, os ataques furos, retransmititos en directo por a televisión a os ciudadans estausunidenses creboron a confianza que a opinión publica estausunidense podría tener en as opinions favorables de Westmoreland sobre o futuro d'a guerra. Un debate politico y a opinión publica feban empenta a l'administración d'o president Johnson ta disminuir o ritmo de creixencia d'o ninvío de tropas estausunidenses a Vietnam u mesmo ta prencipiar a retiradas d'as tropas que i yeran desplegatas. Asinas, clamoron a Westmoreland a Estaus Unius ta que marchase de Vietnam y lo nombroron Chefe d'Estato Mayor de l'Exercito estausunidense dende 1968 dica 1972. Retirato de l'Exercito en 1972, Westmoreland morió en chulio de 2005 en un asilo, con 91 anyadas. O personache A carrera militar de Westmoreland se fació con presidents republicanos u con democratas, y en tenió leyaltat enta unos u enta atros. Sindembargo, as opinions sobre a suya actuación mientres a Guerra de Vietnam son muit controvertitas. As tropas estausunidenses en Vietnam plegoron dica meyo millón de soldatos, dende una cifra de nomás 15.000 que bi heba cuan Westmoreland hi plegó a o país. Ye asinas uno d'os responsables d'a escalada de medios en a guerra y de muertos y atras victimas (en os dos bandos en conflicto). Deciba: «He parato cuenta de no dentrar en a politica. Yo yera un soldado y feba una misión ordenata por o comandant en chefe, que yera o president d'os Estaus Unius». William Westmoreland mai no renegó d'a suya actuación mientres a Guerra d'o Vietnam, incluyindo-ie tirar bombas de napalm en os campos vietnamitas ta fer que os «sublevatos» comunistas albandonasen o territorio. Deciba que a guerra de Vietnam no estió denguna error estausunidense y que a Historia reconoixería a chustificación d'os millons de muertos que heba feito a intervención militar estausunidense en ixe país. «No ye que haigamos perdito militarment a guerra. Ye nomás que, como nación, no hemos feito garra cosa ta millorar o nuestro compromis en Vietnam d'o Sud». Vinclos externos
|
||||||||||||||||||||||||||||||||||||
