|
The Karate Kid
The Karate Kid (títol orichinal en anglés, en aragonés O zagal de karate, enguerada en Aragón con o títol en castellano de Karate Kid, el momento de la verdad, en aragonés Karate Kid, o momento d'a verdat) ye una cinta de cine estausunidense de cine de drama d'artes marcials enguerada l'anyo 1984, dirichida por John G. Avildsen seguntes un guión orichinal de Robert Mark Kamen, con una banda sonora orichinal de Bill Conti, una dirección de fotografía de James Crabe, una producción cinematografica de Jerry Weintraub ta las productoras Delphi II Productions y Jerry Weintraub Productions y con un elenco d'o cual fan parte, entre d'atros actors, Ralph Macchio, Pat Morita, William Zabka, Elisabeth Shue, Martin Kove, Randee Heller, Chad McQueen, Ron Thomas, Tony O'Dell, Rob Garrison y Pat E. Johnson. Daniel LaRusso ye un choven de 17 anyadas que vive con su mai en Newark (Nueva Jersey) pero ista se treslada a treballar a Los Angeles en California. Daniel troba bels problemas con bels companyeros d'o suyo instituto pero encara mas cuan amanixe un intrés mutuo con Ali Mills, una polida mesacha animadora d'os esportes. L'antigo novio d'a mesacha, Johnny Lawrence, ye cinturón negro de karate y lidera una colla de practicants d'ixe esporte que pertenexen a lo dojo Cobra Kai, y s'adedica a perseguir a Daniel. Ble día, cuan l'han encorralau, lo salva lo sinyor Miyagi, que da codillo con facilidat a los atacants. Miyagi ye nativo d'Okinawa y como Daniel ve que conoixe bien o karate, li demana que sía lo suyo entrenador. Tanimientres, as clases de karate no son como Daniel contaba, encara que son bien efectivas. Y ta conseguir que dixen tranquilo a Daniel, Miyagi l'inscribe en un campionato de karate, a on habrá de luitar contra los miembros d'o Cobra Kai. Ye una cinta que dio orichen a una franquicia cinematografica, The Karate Kid (franquicia), protagonizada por Ralph Macchio y Pat Morita, y que continó con The Karate Kid Part II (1986, John G. Avildsen), The Karate Kid Part III (1989, John G. Avildsen) y The Next Karate Kid (1994, Christopher Cain), encara que en ista zaguera cinta no partecipó Ralph Macchio. S'ambienta en a suya epoca actual (1984) en Newark (Nueva Jersey) y Los Angeles (California) y las suyas escenas se rodoron en Agoura Hills, Calabasas, Los Angeles, Malibu, Norwalk y Westlake Village (California), Harrison (Nueva Jersey) y Phoenix, Sedona y atros puestos d'Arizona.[2] The Karate Kid ye una cinta que ha recibiu bels premios y nominacions, en destacando una nominación a los Premios Oscar (Millor Actor Segundario) en a suya 57ena edición y una nominación a los Premios Globos d'Oro (Millor Actor Segundario) en a suya 42ena edición. Elenco[3]
Se veiga tamiénReferenciasVinclos externos
|
