- Iste articlo ye sobre un río aragonés; ta atros usos, se veiga Alcanadre (desambigación).
O río Alcanadre[1][2] ye un río aragonés que fa parte d'a cuenca hidrolochica d'o río Ebro. Ye un afluent d'a Cinca, y o suyo naixedero se troba en a sierra d'Alcanadre, a 1.700 metros d'altaria sobre o livel d'a mar,[3] trescruzando en o suyo recorrito a sierra de Guara antis d'a suya desembocadura en o río Cinca en Ballobar. A suya longaria ye de 147,3 km y o suyo cabal meyano ye de 15,38 m³/s.
Os suyos principals afluents son os ríos Balcez, Mascún, Isuela y Guatizalema.
En a sierra de Guara fa una foz y en o suyo cauz bi ha un parache con gorgas dito Gorgas Negras.
Referencias
