|
Obesidat
 A obesidat ye a condición d'o cuerpo en a cual la cantidat de grasa acumulata tien un risgo ta la salut, reducindo a esperanza de vida de l'individuo.[1] A lo largo d'a historia la delimitación d'o concepto d'obesidat ha ito cambiando: bella cultura y relichión la consideraban como un signo de riqueza y felicidat y no la teneban como una amenaza ta la salut. D'atra man bella población humana, como por eixemplo los polinesios, tienen gran propensión a la obesidat mientres que en atras como la chinesa cuasi no en tienen. A cultura recient d'os países occidentals ha presentato como modelo mas deseyable a fegura delgada y iste concepto s'ha difundito amplament en totas as artes y a publicidat, provocando uns efectos psicolochicos adversos en as personas con sobrepeso u obesos. Han apareixito asociacions d'obesos que han reaccionato contra lo que consideran una presión contra la suya condición y reivindican a normalidat d'a obesidat. A incidencia d'o sobrepeso y a obesidat sobre a población mundial ha rechistrato un gran augmento a partir d'a decada de 1980 y se considera, por eixemplo en os Estaus Unius, como lo periglo mas grieu ta la salut d'os ciudadans. A obesidat ye un factor determinant en l'aparición de malautías cardiovasculars, gastro-intestinals, artrosis, mal d'esquena y diabetis y pa prevenir-la s'ha d'evitar o consumo excesivo de zucres y grasas y practicar exercicio fisico. A persona obesa ha de seguir una dieta hipocalorica, mesmo tamién en o caso d'obesidat por condicionants cheneticos pa evitar o risgo d'atras malautías. ClasificaciónA obesidat per un regular se define como una acumulación substancial de graixa corporal que podría afectar a salut. As organizacions medicas tienden a clasificar a las personas como obesas seguntes l'índiz de masa corporal (IMC), una relación entre lo peso d'una persona en kilogramos y lo cuadrau d'a suya altaria en metros. Pa los adultos, a Organización Mundial d'a Salut (OMS) define sobrepeso como un IMC de 25 u mas, y obeso como un IMC de 30 u mas. Os Centros pa lo Control y la Prevención de Malotías d'Estaus Unius subdividen a obesidat seguntes l'IMC, con un IMC de 30 a 35 clamau obesidat de clase 1; 35 a 40, obesidat clase 2; y 40+, obesidat clase 3.[2]
Referencias
|
