|
Georges Clemenceau
Georges Benjamin Clemenceau, naixito de Mouilleron-en-Pareds (Vendée, Países d'a Loira) o 28 de setiembre de 1841 y muerto en París (Isla de Francia) o 24 de noviembre de 1929, estió un periodista y politico francés mientras a Tercera Republica Francesa, primer ministro de Francia dende o 25 d'octubre de 1906 dica o 20 de chulio de 1909 y dende o 16 de noviembre de 1917 dica o 18 de chinero de 1920. Tamién estió ministro, senador y alcalde de París. Estió un activo esfensor d'a deseparación en o suyo país entre a Ilesia Catolica y o Estato, y luitó contra a expansión d'o colonialismo francés, destacando tamién por estar l'establidor d'o diario La Justice y d'a Société des Droits de l'Homme et du Citoyen. Tamién estió, mientras o dito caso Dreyfus, un activo dreyfusard dende as pachinas d'o diario L'Aurore. Antiparte, recibió as embotadas d'O Tigre y Père-la-Victoire (pai d'a Victoria) en estar mientres a Primera Guerra Mundial uno d'os politicos franceses mas comprometius en a victoria contra os alemans y por a suya capacidat de luita politica. En rematar a guerra partecipó en representación de Francia en a Conferencia de paz de París y tamién en as charradas preliminars a o tractau de Versailles, estando uno d'os prencipals impulsors d'as reparacions de guerra que heba de pagar Alemanya. Criticau en rematar a guerra dende a dreita y dende a ezquierda, se presentó a las eleccions presidencials de chinero de 1920, estando-ne redotau y decidindo dende alavez albandonar a vida politica activa. Vinclos externos
|
||||||||||||||||||||||||||||||||||||||||||||
