Bienvenue chez les Ch'tis (títol orichinal en francés, en aragonés Bienvenida en casa d'os Ch'tis, enguerada en Aragón con o títol en castellano de Bienvenidos al Norte, Bienvenius en o Norte en aragonés) ye una cinta de cine de comedia francesa de l'anyo 2008 dirichida por Dany Boon seguntes un guión orichinal d'o mesmo Dany Boon y d'Alexandre Charlot y Franck Magnier, con una dirección de fotografía de Pierre Aïm y una Banda Sonora Orichinal de Philippe Rombi. Ye producida por os productors Claude Berri y Jérôme Seydoux ta las productoras Pathé Renn Productions, Pathé, Hirsch Production, Les Productions du Chicon y TF1 Films Production y en l'elenco d'a cinta aparixen actors como Kad Merad, Dany Boon, Zoé Félix, Anne Marivin u Line Renaud.
En a cinta se contan as aventuras d'un treballador de La Poste, o correu oficial francés, a qui han destinau en a desapareixida rechión de Norte-Paso de Calais y que se veye obligau a mentir a su familia en decindo-les que se i vive muit mal. A suya historia se desembolica en o departamento d'o Norte mientres os anys 2000 y se rodó en ixe mesmo departamento, en o departamento de Paso de Calais y en as ciudaz de Lille, Ais de Provença y Cassis (Bocas d'o Roine) y en os estudios en Arpajon (Essonne).
Bienvenue chez les Ch'tis tenió un important exito de publico en Francia y en atros países d'Europa y recibió cuantos premios y nominacions. Sindembargo, en a 34ena edición d'os Premios César en 2009 nomás recibió que una sola nominacion, a lo Millor Guión Orichinal, que finalment ganó Séraphine (2008, Martin Provost, con guión de Martin Provost y Marc Abdelnour). Ixo provocó la carranyeta d'o director Dany Boon, qui acusó a l' Académie des Arts et Techniques du Cinéma (entidat concesora d'os premios) d'"espernir a comedia francesa". Se charró d'a posibilidat de fer-ne un remake en o cine estausunidense y en o cine italiano, pero finalment no se filmó so que iste zaguero, con o títol de Benvenuti al Nord (2012, Luca Miniero).
Se veiga tamién
Referencias
Vinclos externos
